Israel-Hamas war : Hamas-in an mi hrente video tichhuak

Israel nena indo mek, Gaza Strip-a rorel lai, Palestinian firfiak pawl Hamas chuan Thawhṭanni khan an mi hren zinga mi pathumte video an tichhuak. Heng mite hi Hamas-te'n October 7-a Israel an beih ṭuma an mante an ni.

Hamas video tihchhuahah hian an mi hren mek zinga Israel mi hmeichhe pathum an lang a, Israel prime minister Benjamin Netanyahu chuan heng mite hi Yelena Trupanov, Daniel Aloni leh Rimon Kirsht-te an nih thu a sawi. Hmeichhe pathumte hi bang bulah, plastic chair-ah an ṭhu a, an awmna hmun tak erawh tarlan a ni lo. An zinga pakhat chuan Hebrai ṭawnga thu sawiin, Israel Prime Minister hnenah Hamas-te'n tang inthleng tura an rawtna siam chu pawm turin a ngen.

Israel chuan Hamas-te hian October 7-a Israel an beih ṭum khan mi 239 an man niin an sawi a, hetih lai hian Hamas hian Israel sipaite'n Gaza Strip an beihnaah an mi man zinga 50 dawn an thi nia sawiin, an la hren mek zat erawh an sawi lang lo. Israel official-te chuan Hamas-te an man zingah hian nausen leh kum 80 chuangte pawh an tel tih an sawi a, firfiak pawlte leihnuaia tunnel an siamah an hreng nia an rin thu an sawi bawk.

Hamas hian an mi man zinga pali an chhuah tawh a, October 17 khan an mi hren mek zinga mi pakhat, Israeli-French Mia Shem video an lo tichhuak tawh bawk. Israel sorkar chuan an mi hren mekte chhuah zalen an nih theihna atan Israel ram jail hrang hranga Palestinian tang zawng zawng chhuah turin an phut a ni.

Israel palaiin Nazi hunlaia Juda-te an bel luihtir Yellow Star bel

United Nations-a Israel palai, Gilad Erdan chuan Thawhṭannia UN Security Council meeting-ah, Nazi-te'n Juda mi an suat hunlaia Juda mite an bel luihtir, yellow star chu a kawrah a rawn bel a, UNSC-in Hamas-te pawikhawihna thlen demna thu a siam hma chu he badge hi a bel zel tur thu a sawi.

October 7-a Hamas firfiakte'n Israel rama pawikhawihna rapthlak tak an thlen chungchangah tun thlenga Security Council a la ngawi chu a dem thu Erdan chuan a sawi. Israel leh Hamas-te hi kar thum chhung indo tawh mah se, hemi chungchangah hian member ram 15 awmna, UNSC hian resolution pakhat pawh a la siam thei lo a ni.

Gilad Erdan chuan, "Vawiin aṭangin, min en apiangin pawikhawihna rapthlak tak thleng ngawihsan reng a nih chungchang in hre reng zel ang. Ka pi leh pute, Juda hnam mi tam takte beltir an lo nih ang kha, kei leh ka team chuan yellow star hi kan bel zel dawn a ni," a ti. Hemi rual hian yellow star chu Juda hnam a nihna a chhuanna lantirna a ni dawn tih a sawi bawk.

Israel prime minister Benjamin Netanyahu pawhin October 7-a Hamas-te'n Juda mi an beihna chu, Nazi hunlaia Juda mi tam tak suatna, Holocaust hnua Juda-te laka pawikhawihna thleng rapthlak ber a nih thu a lo sawi tawh bawk a ni.