Bangladesh-ah Myanmar team zin

Bangladesh-a Rohingya raltlan awm mekte Myanmar rama hruai kir an nih dan tur buaipuiin nimin khan Myanmar official-te'n Bangladesh an thleng.

Kum 2017-a Myanmar sipaite beihpui thlakna avangin Rohingya mi tam tak an tlanchhia a, Bangladesh-ah hian Rohingya raltlan hi maktaduai khat dawn an la awm a, refugee camp hrang hrangah an khawsa mek a ni.

Bangladesh leh Myanmar sorkar chuan raltlante hruai kir an nih theihna turin inbiakna pawh an lo nei tawh a, hetih lai hian raltlan zinga ṭhenkhat chuan Myanmar sorkarin khua leh tui nihna a pek a, an ram ngai pek kir leh an nih loh chuan an kir duh lo tih an sawi thung.

Myanmar team hi ramri bul, Bangladesh-a river port, Teknaf-ah kalin raltlan ṭhenkhat an kawm a, vawiin hian an ramah an kir leh nghal ang. Bangladesh official-te chuan kumin April thlaa China enpuina hnuaia ram pahnihte'n inremna an lo siam tawh angin, December thla hian repatriation scheme pilot project-ah raltlan 3,000 te chu Myanmar chuan hruai kir a tum tih an sawi.