Pakistan aṭangin Afghan mi tam tak an ramah kir

Pakistan sorkarin document mumal nei loa ram dang aṭanga an rama pem lutte dap chhuah a, thawn kir leh vek a tum thu a puan hnuah, Pakistan rama tlanchhia Afghan mi tam tak chu an ramah an kir.

Afghanistan-a rorel lai, Taliban sorkar chuan September 22 - October 22 inkar khan Pakistan aṭang hian Afghan mi 60,000 vel chu Afghanistan-ah an kir tawh niin a sawi. Ni tin kir hi an la awm belh reng bawk.

Pakistan-ah hian Afghan mi pem lut leh raltlan hi maktaduai 4 chuang an awm a, an zinga maktaduai 1.7-te chu document nei loa lut nia sawi an ni. Tam tak hi chu kum 1979-a Soviet Union-in Afghanistan a run avanga tlanchhiate niin, kum 2021-a Taliban-te'n Afghanistan sorkarna an chelh hnuah tlanchhia eng emaw zat an awm bawk. Pakistan foreign ministry thupuangtu, Mumtaz Zahra Baloch chuan document nei loa pem lutte thawn kir an tum chungchangah, international norm leh principle-te pawh an zawm thlap niin a sawi. He thil hi an ram himna leh ṭhatna tura ti an nih thu sawiin, dan loa pem lut tam takin an ram sum dinhmun thlengin harsatna a thlen niin an tarlang.

Pakistan sorkar hian document nei loa ram dang aṭanga pem lut, mahni thu ngeia an ram lama kirte hi sum lama puihna pawh pek an nih tur thu a sawi a, November 1 thleng hun a pe. Hemi hnuah hian kir duh lote dap chhuah hna hi an thawk dawn a, heng mite hi manin an ramah thawn kir luih an ni dawn tih an sawi a ni.