Israel-Hamas war : Israel-in Gaza-a refugee camp lian ber bomb

Israel sipaite chuan Thawhlehni khan Gaza Strip-a refugee camp lian ber, Jabalia refugee camp an bomb a, beihpui an thlaknaah hian Hamas commander a thi tih an sawi. Hamas chuan camp beihnaah hian mi 50 vel an thi niin an sawi.

Thawhlehni vek khan khan Gaza-a inbeihnaah Israel sipai 11 an thi a, pahnihin hliam an tuar. October 7 aṭanga Hamas firfiak nen an inbeihnaah Israel sipai thi hi 326 an tling tawh. Hamas military wing, Ezzedine al-Qassam Brigade chuan Gaza chu Israel sipaite thlanmualah an chantir dawn tih an sawi zui nghal bawk.

Israel prime minister Benjamin Netanyahu chuan indonaa thi zat an pun chhoh mek karah pawh Hamas nena inkahhai puan an tum loh thu a sawi nawn leh a, inkahhai puang tura nawrtute chuan Hamas kuta Israel inpe tura ngenna, firfiak kuta tlawm tura ngenna ang a ni, a ti.

US secretary of state Antony Blinken chuan naktuk hian Israel ram tlawh leh a tum a, sorkar mi pawimawhte meeting a neihpui dawn tih US state department thupuangtu, Matthew Miller chuan a sawi.

Nimin khan Gaza Strip-a internet leh inbiakpawhna dangte tihtawp leh a ni a, kar khat chhunga ṭum hnih tihtawp a nihna a ni.

Middle East ram hrang hrangte chuan Israel-in refugee camp a bei chu an dem thu an sawi a, South America ramte pawhin Israel sipaite beihpui thlakna chu titawp tura an phut thu an sawi. Bolivia chuan Israel nena an inzawmna a tihtawp thu a puang a, Colombia leh Chile pawhin Israel rama an ambassador-te an ko kir bawk a ni. Chhawmdawl hna thawktute pawhin inkahhai puang tura na zawka khawvel ram hrang hrang hruaitute'n an nawr a ṭul tawh thu an sawi bawk.

Gaza Strip-a inbeihna thlenga Palestinian mi hliam tuarte chu Egypt rama an inenkawl theihna turin, nimin aṭang khan Rafah border crossing kaltlangin Egypt-ah ambulance luh phalsak an ni. Gaza-a foreign passport nei awmte chu nimin khan a ṭum khatna atan Rafah crossing kaltlangin Egypt chhim lamah an luh phalsak an ni bawk a, eng zat chiah nge lut erawh hriat chian a la ni lo. Gaza Strip-ah hian foreign passport holder hi ram 44 aṭangin an awm nia sawi a ni.

October 7-a Hamas-te'n Israel an beih ṭuma an mi thah chhungte chuan International Criminal Court-ah Israel mite beih leh ruk bo an nih chungchangh chu chhui chiang turin an ngen. Mahse Hague-based court-ah hian Israel hi member a ni ve lo thung.