China-in population survey a nei ṭan

China chuan an rama mihring punna a tlakhniam zel karah, nimin aṭang khan an ram mipui zir chianna, population survey a nei ṭan.

October 10 khan sorkar chuan population survey neih a nih tur thu hi a puang a, a bikin urban leh rural area-te thlurbing a ni dawn tih a sawi. Survey hi November 15 thleng kalpui a ni dawn tih National Bureau of Statistics chuan a sawi.

He survey aṭang hian China rama mihring dinhmun inthlak chhoh dante zir chian theih a ni dawn a, rorel lai Communist Party pawhin hemi behchhan hian economic, social development leh population kaihhnawih policy-te a duang thei dawn a ni. Inah kalin data an la khawm dawn a, an kal theih lohnate chu online hmanga zawhna chhan turte pek an ni bawk ang.

Chhiarpui an neih hnuhnung ber, kum 2020 November thlaa an tihchhuahah khan, kum 1950 hnu lamah kum 10 kal ta chhung mihring punna tlakhniam ber ṭum a ni. Khawsak a hautak a, naupang enkawlna senso te a san zel avangin fa pakhat bak neih emaw, fa neih duh lo emaw pawh hmeichhe tam tak an awm a ni.