Israel-Hamas war : Israel nena insumdawn tawnna titawp turin Muslim ramte ngen

Israel leh Hamas firfiakte indona thleng mekah, Iran ram hotu lu ber, Supreme Leader Ayatollah Khamenei chuan Muslim ram hrang hrang hnenah Israel nena insumdawn tawnna titawp a, oil leh ei tur an thawn chhuah ṭhin chu titawp turin a ngen. Hei bakah Israel sipaite'n Gaza Strip an bomb chhunzawm zel chu tawp tawh tura a phut thu a sawi bawk.

Khamenei chuan, "Gaza an bomb hi an titawp nghal tawh tur a ni. A nih loh chuan Zion ram tana oil leh ei tur thawn chhuah ṭhin hi tihtawp vek a ni tur a ni," a ti. Hetih lai hian Israel chuan Iran thlawp, Hamas firfiak pawlte hi nuai chimih vek an tum thu an sawi thung.

Tehran-a zirlaite hmaa thu a sawiah, Khamenei chuan Britain, France leh US sorkar chu Palestine dodaltu tiin na takin a sawi. "Muslim ramte chuan Gaza mipuite nawrtute hi an theihnghilh tur a ni lo. Israel ram chauh an ni lo tih an hriat a ngai," a ti. Iran defence minister Mohammad Reza Ashtiani pawhin Israel thlawptu Europe ramte chu Muslim-te tithinur lo tura fimkhur turin a vau zui bawk.

Iran hian Hamas hi sum lamah pawh a pui nasa a, October 7-a Hamas firfiakte'n Israel an beih pawh fakin, hlawhtlinna ropui tak a ni tiin a sawi a, mahse, he thilah hian inhnamhnawihna a nei lo niin a sawi thung.

Egypt-in foreigner hruai chhuahna turah pui dawn

Egypt chuan Gaza Strip aṭanga foreign passport holder leh dual national-te hruai chhuahna kawngah a pui dawn.

Nimin khan Egypt foreign ministry chuan thuchhuah siamin, Rafah border crossing kaltlangin Gaza Strip aṭang hian foreigner 7,000 vel hruai chhuah an ni dawn tih a sawi. Nilaini khan Gaza chhuahsan turte tan border crossing hi an hawng a ni. Hemi ni hian foreign passport holder 335 bakah Gaza Strip beihnaa hliam, Palestinian mi 76-te chuan Egypt-ah an lut. Foreigner lutte hi Austria, Italy, France leh Germany ram mite an ni.

Ram hrang hrang palaite nena meeting an neihnaah, Egypt assistant foreign minister Ismail Khairat chuan Egypt chuan foreign citizen-te hruai chhuahna tur hi an buaipui mek tih sawiin, Gaza-a foreigner 7,000 vel awmte chu ram hrang hrang 60 chuanga mi an ni tih a sawi.