Myanmar sipaite'n China ramri bula khua an bomb

Myanmar sipaite chuan China ramri bula khua, Kachin helpawl Kachin Independence Army (KIA) thununna hnuaia awm, Laiza khua chu a ni hnihna atan Nilaini khan an bomb leh.

KIA thupuangtu, colonel Naw Bu chuan sipaite hian thlawhtheihna hmangin Nilaini chhun dar 12:45 khan Kachin state-a Laiza khua hi an bei a, a hma ni pawhin bomb pathum a lo thlak tawh a, mi pakhat thiin mi 12 an hliam tih a sawi. Thawhlehni khan KIA leh sipaite hi an inkap bawk a, sipai lamah hian thi an awm nia sawi a ni.

Shan state-ah pawh kar liam ta khan helpawl pathum, Ta’ang National Liberation Army, Arakan Army leh Myanmar National Democratic Alliance Army (MNDAA) intel khawm, Brotherhood Alliance leh sipaite an inkap a, hei vang hian mi tam tak chu hmun him lamah an tlanchhia. Shan state hi China-a oil leh gas supply-na pipeline awmna niin, China-in Belt and Road global infrastructure project a siam hnuaia rel hmanga inkalpawhna tur siamna tur a ni bawk. Brotherhood Alliance hian fighter 15,000 vel an nei nia hriat an ni a, an bial tana autonomy phutin sipaite nen hian an inbei fo a ni. Tun hnaiah Myanmar leh China inkalpawhna kawng pawimawh tak tak leh military post eng emaw zat chu sipaite kut aṭangin a laksak tawh.