Israel leh UEA-in Inremna an siam

Israel leh United Arab Emirates (UAE) chuan ram pahnihte inlaichinnaah bung thar kaiin, in palai tawnna turin inremna an siam tih Ningani khan an puang. 

Inremna hi US President Donald Trump hmalakna hnuaiah siam a ni. President Trump, Israel prime minister Benjamin Netanyahu leh Abu Dhabi Crown Prince Sheikh Mohammed bin Zayed-te chuan thuchhuah inṭawm siamin, Israel leh UAE inkar boruak ṭha zawk siam chu an remtih thu an sawi a ni. 

Inremna an siam hmang hian ram pahnihte hian inṭhianṭhatna kawngah bung thar an kai dawn a, an ramin theihna an neihte pawh an pholang chho zel dawn tih an sawi. Inremna an siam tak avang hian Israel leh UAE hian ambassador-te intir tawnin, embassy pawh an din thuai rin a ni.

President Trump chuan ram ṭhian hnai leh thawhpui ram pahnihten an inzawm thei ta tih sawiin, hei hi Middle East-a remna leh muanna a awmna tura hmasawnna pawimawh tak a ni, a ti. 

UAE chuan Palestinian-ten West Bank, Gaza leh East Jerusalem-a Palestinian ram din an tumna chu a thlawp chhunzawm zel dawn tih a sawi.  Israel nena inremna an siam hian Israel-Palestinian te inkar buaina, two-state solution chungchang pawh chinfel theih a ni tih a tilang a ni, tiin a sawi. Israel pawhin inremna an siam hnuaiah Palestinian ram a luahsak, West Bank-a a ram luah zauh bel zel a tumna chu tihtawp rih a remti bawk a ni. 

Israel hian kum 1979 khan Egypt leh 1994-ah Jordan chu inremna a lo siampui tawh a, mahse UAE telin, Arab ram zawk chuan Israel chu an pawm lo a, palai  pawh intirh tawn an duh lo a ni. UAE hi Gulf Arab ram zingah Israel nena inremna siam hmasa ber a ni. Hei hi Palestinian hruaitute chuan an sawisel nghal a, UAE chuan hnung lam aṭangin a bei nia an ngaih thu an sawi.