President atana NLD nominate-te pawm

Myanmar Parliament in hnih, upper house leh lower house chuan Aung San Suu Kyi-i party, National League for Democracy party-in presiden candidate atana a nominate-te chu nimin khan an pawm.

NLD hian president candidate atan hian Lower House aṭangin Htin Kyaw leh Upper House aṭangin Henry Van Thiyu-te a nominate a, sipai thlawptu party lamin Sai Mauk Kham leh Khin Aung Myint-te an nominate ve bawk.

Nimin khan Parliament member-te hian party pahnihten president candidate atana an nominate-te hi an thlang a, NLD candidate-te hi an pawm ta a ni. Lower House-ah chuan member in President candidate atan NLD member, Htin Kyaw hi an thlawp a, sipai thlawp party in a nominate, Sai Mauk Kham hi member 29 in an thlawp thung.

Upper House-ah Henry Van Thio-a member 148 in thlawpin, Khin Aung Myint thlawptu hi member 13 an awm. President thlanna neih turah hian candidate pathum an awm dawn a, Lower House leh Upper House candidate bakah, Parliament-ah seat 25% changtu, sipai lamin candidate hran a siam bawk ang. Sipaite hian canditate tur hi a la siam ve lo.

Parliament member-te hian candidate pathum aṭangin an ram president tur hi an thlang chhuak dawn a, mahse vote thlak ni tur hi tihfel a la ni lo a, mahse kar leh chhunga neih beisei a ni. Candidate pathum zingah a vote hmu sang ber chu President a ni dawn a, midang pahnihte pawh vice-president-ah dah nghal an ni ang. President thlanna neih turah hian Lower House candidate, kum 70 mi Htin Kyaw chu tling tura rinlawk a ni. President thlan thar hian April ni 1 aṭangin a office a luah ṭan ang.

Lower House-in candidate tana a chhawp chhuah, U Htin Kyaw hi NLD hotu, Suu Kyi-i ṭhianṭha tak niin, school pawh an kal tlang a ni. Suu Kyi-i foundation-te enkawl sakin,a driver-ahte a ṭang ṭhin bawk. Upper House candidate Henry Van Thio hi kum 58 mi niin, China hnam aiawh a ni. Kristian a ni a, Yangon and Mandalay University-ah lehkha a zir ṭhin a, sipai officer pawh a lo ni tawh a ni.

NLD in president candidate tur zinga Chin hnam aiawh a thlang hian mak tih a hlawh hle a, mahse hei sorkar thar siamtu tur party hian an rama hnam tenau hrang hrangte tihlawm a tumna pakhat nia ngaih a ni.

President thlan fel a nih hunah cabinet pawh thlan nghal a nih rin a ni. NLD hotu, Suu Kyi-i chuan sorkar nghet leh mipui huap zo sorkar an siam tur thu a sawi. Suu Kyi-i hian ramdang mi pasal-ah neiin fapa pahnih a nei a, hei vang hian an ram President dinhmun hi a luah ve thei dawn lo a ni. Mahse sorkar an siam hunah President aia lalah a awm dawn tih a lo sawi tawh a ni.

NLD hian Parliament in hnihah majority nei ve ve mah se, an ram danpui hnuaiah sipaite tan seat 25% dahsak a ni a, hei bakah hian sorkar tharah pawh ministry ṭhenkhat chu sipaite hian an la chang chhunzawm dawn a ni.