Darraya khaw miten ṭanpuina an dil

Syria rama helho kuta awm, Darayya khaw mipuite chuan United Nations hnenah ṭanpui tura ngenin, mipuite mamawh chhawmdawlna hrang hrangte thawn luh phalsak tir tura nawr turin an ngen.

Darayya khua hi Syria sorkar laka helho kutah a awm a, President Bashar al-Assad-a kaihhruai sorkar sipaite chuan he khua hi pawn lam aṭangin kum thum vel zet an hual tawh a ni. Hei vang hian mamawh chawk luhna kawngah harsatna an tawk a, khawchhung mipuite dinhmun pawh a chhe hle a ni.

Khaw mipuite hi pungkhawmin, an khuaa chhawmdawlna thawn lut turin ram dangte an ngen a, ṭanpuina ngena pungkhawm zinga a tam zawk hi hmeichhia leh naupang an ni. Naupangte chuan UN official-te ṭanpuina ngenin, 'SOS' tihte an ziak a ni.

Syria helhoin khua an hren engemaw zat tan UN leh a thawhpuite chuan chhawmdawlna an lo thawn lut tawh a, truck 536 in mi 240,000 hnenah an mamawhte an sem a ni. Syria-a UN Humanitarin Coordinator Yacoub El Hillo chuan April thla tawp hmanin harsatna tawk mek khaw hrang hrang tan chhawmdawlna tam zawk thawn luh a ni dawn tih a sawi a, mahse heng zingah hian Darayya khaw hming hi a sawi tel lo.

Hetihlai hian Syria sorkar leh helhoin kar hnih chhung tana inkahhai an puan chu nizan khan a tawp a, mahse UN special envoy Staffan de Mistura chuan innremna an siam hi an hman chhunzawm zel a beisei thu a sawi.