North Korea-in lockdown hlip

North Korea ram hotu, Kim Jong-un chuan Covid-19 kai hmuh a nih avanga South Korea nena an inrina bul khuaa kar thum chhung lockdown a puan chu nimin khan a hlip. 

July 26 khan South Korea aṭanga dan loa North Korea-a lut ru mi pakhat chuan Covid-19 hri a kai tih hmuhchhuah a ni a, hei vang hian a rawn luh rukna khua Kaesong leh a chheh velah lockdown puan nghal a ni. Kim chuan hri kai hmuhchhuah ni vek khan ram pumah emergency a puang nghal. An ram dinhmun chung chang enletna neiin Ningani khan meeting neih a ni a, he hunah hian lockdown puan hi chhunzawm a nih dawn leh dawn lohte rel a nih thu Korean Central News Agency (KNCA) chuan a tarlang. Meeting-ah hian Kaesong leh a chheh vel chu a him tawh thu Kim chuan sawiin, hei vang hian lockdown puan pawh hlip anih thu a sawi bawk.

Kim chuan an ramri te chu khar chhunzawm zel a nih tur thu sawiin, an ramin hri leng a dona kawngah leh tuilian a tawrh meknaah ram dangte puihna an duh loh thu sawiin, pawn lam aṭanga Covid-19 hri a luh a hlauhawm thu a sawi. Tuilian vanga in leh lo chante a tawrhpui thu a sawi a, mahse ramri te khar vek a nih avangin ram dang aṭangin tuilian tuarte ṭanpuina tur lakluh an remti lo tih a sawi.