Afghanistan-in Taliban jail tangte chhuah

Afghanistan sorkar chuan inremna an lo siam tawh angin Taliban firfiak tang la awm 400 te chu a chhuah ṭan ta. 

National Security Council chuan Ningani khan firfiak 400 zinga 80 chu chhuah an ni tih sawiin, midangte pawh chhuah chhunzawm zel an ni dawn tih a sawi. Hun rei tak sorkar leh firfiakten inremna zawnga inbiakna an neihte chak zawka kalpui a nih theih nan te, ram puma inkahhai puan a nih chhunzawm zel theihna atan firfiak tangte hi chhuah an nih thu National Security Council chuan a tarlang. 

Tang 400 zinga mi 44 te chu pawikhawihna lian tham tak tak, US leh ram hrang hranga firfiaka chetna thlenga inhnam hnawihte an nih avangin thuneitute chuan chhuah mai an remti lo a, hei vang hian an chungchang hi kar liam ta khan Kabul-a Loya Jirga consultative assembly-ah ngaihtuah a ni. President Ashraf Ghani pawhin heng mite chhuah hi khawvel tan pawh thil hlauhawm tak a ni dawn tiin a sawi hial. Mahse Assembly chuan jail aṭanga chhuahtir hi a remti ta a ni. 

Kumin February 29 khan US leh Taliban firfiak pawl chuan kum 18 chhung zet an inkara buaina awm tawh chu tihtawp a nih theih nan inremna an ziak a, inremna an ziahah hian, March 10-ah Taliban jail tang 5,000 leh Afghanistan security force jail tang 1,000 inthlengna neih fel tur tih a tel a ni. He inremna an siam hi Taliban leh Afghanistan sorkarin inbiakna an neih theihna tura kawng hawnna atan an ti a ni.