Israel-Hamas war : Tel Aviv-ah Blinken leh Netanyahu inhmu

US secretary of state Antony Blinken chu Israel-ah a zin a, nimin khan Tel Aviv-ah Israel prime minister Benjamin Netanyahu nen an inhmu. Blinken hian Hamas nen an indo hnua Israel-in a din thar, war cabinet member-te pawh a hmu bawk.

October 7-a Hamas firfiakte'n Israel an beih hnuah, Blinken hian Israel a tlawh ṭum thumna a ni. Prime Minister Netanyahu nena an inkawmnaah, Blinken chuan Israel sipaite'n Gaza Strip an beihnaa civil mite tawrhna a tlem thei ang bera thlen tura a duh thu leh, hemi atana Israel sorkarin hma a lak dante a zawt.

Israel sipaite'n Gaza City hual vek tawh

Israel sipaite chuan Gaza Strip-a an khawpui ber, Gaza City chu an hual fel tawh niin Ningani khan an sawi. Hetih lai hian Palestinian firfiakte hian an leiverh lam aṭangin ṭan an lo la ve thung.

Prime Minister Netanyahu chuan indona vanglai tak an thleng mek tih sawiin, an hmalaknaah hlawhtling zelin, Gaza City khaw dai pawh pel tawhin, hma lam an pan zel tih a sawi. Mahse sipaite chet lak dan kimchang erawh a sawi lang tel lo.

Israel Defence Force (IDF) thupuangtu, rear admiral Daniel Hagari chuan an sipaite chuan Hamas firfiakte hmun pawimawh ber, Gaza City an hual fel tawh tih a sawi a, Israel military engineer hotu brigadier general Iddo Mizrahi pawhin sipaite chuan firfiakte thang kam hrang hrangte an bei let zel tih a sawi ve bawk.

IDF-in Hamas mi hren mek mi 241 niin sawi

Rear admiral Daniel Hagari chuan Hamas-te'n Israel leh civil mi dang an hren mek chu mi 241 an ni tih Ningani khan a sawi a, a hmaa an sawi aiin pakhatin an kiam.

Hagari chuan intelligence lam aṭanga an thu dawn a nih thu a sawi, October 7 aṭanga Hamas-te nen an inbeihnaah Israel sipai 338 an thi tawh tih a sawi bawk.

IDF hian Gaza Strip-a civil mite chunga Hamas-te chet dan rawng tak pho chhuah an tum tih sawiin, firfiakte hian Al-Shifa hospital aṭangin fuel ru chhuakin, hei hi Israel beihna tur atante an hmang a ni, a ti. Nimin khan IDF hian hospital aṭanga Hamas-te'n fuel an lak chhuah chungchang healthcare worker-te'n an sawi lai recording chu a tichhuak a, an thusawi aṭangin Hamas hian fuel hi litre maktaduai chanve vel an laksak tawh niin a lan thu official-te chuan an sawi.