February 8-ah Pakistan inthlanpui nei dawn

Election Commission of Pakistan (ECP) chuan nakkum February 8-ah an ram inthlanpui neih a ni dawn tih a puang.

Pakistan Parliament chu August 9 khan ṭhiah a lo ni tawh a, prime minister Anwaar-ul-Haq Kakar kaihhruai caretaker government-in a enkawl mek a ni. Parliament ṭhiah a nih aṭanga ni 90 chhunga inthlanpui hi buatsaih tur ni mah se, ECP chuan census hnuhnung ber pawm tak behchhana constituency boundary-te siam ṭhat leh a ngaih avangin hun an mamawh tam niin a sawi. Ningani khan ECP member-te hian president Arif Alvi hmuin, inthlan neih hun tur hi an tifel.

Election body hian a tirah inthlan neih hun atan February 11 a rawt a, mahse, chief justice of Pakistan Qazi Faez Isa'n inthlan neih hun tur chungchang President Alvi kuta a dah hnuah, EC member leh President hian an sawiho a, lungrual takin February 8 chu inthlan neih hun atan an pawm ta a ni.