Bangladesh police-te'n nawrh huaihawtte hnawt darh

Bangladesh police-te chuan hlawh tihsan phuta nawrh huaihawt mek, garment factory-a thawkte chu nimin khan tear gas leh stun grenade hmangin an hnawt darh.

Thawmhnaw siamna factory-a thawkte hian hlawh tihsan phutin a zawnin ni ruk an nuar tawh a ni. Nimin khan nawrh huaihawt a Dhaka-a Mirpur area-a pung khawm, mi 1,000 chuang chu police-te hian an hnawt darh a ni. Dhaka khaw pawn, Gazipur industrial district-ah pawh nawrh huaihawt mi sang tel an pung khawm bawk.

Hnathawktute nawrh huaihawt avang hian Dhaka leh Gazipur-a factory 300 vel chu khar a ngaih phah a ni.

Bangladesh hi China dawta khawvela thawmhnaw siam chhuaktu lian ber niin, thawmhnaw siamna factory hi 3,500 dawn a awm a, heng hmunah hian thawktu maktaduai li vel an awm. Thawktu zinga a tam zawk hi hmeichhia an ni tih Bangladesh Garment Manufacturers and Exporters Association chuan a sawi. Garment factory-a thawkte hian thla khatah an ram pawisa, taka 8,300 (USD 75) te an hlawh. Thil man a san chhoh zel avangin an hlawh hi tisang ve turin an phut a, thla khatah USD 208-a tihsan an phut laiin, BGMEA lam hian USD 90-a tihsan an rawt thung a, an inrem thei lo a ni.