NKorea tuihnuailawng a bo

North Korea tui-hnuailawng chu an ram khawchhak lam tuipuiah a bo a, a pil nia an rin thu US media-te chuan an tarlang.

Tuihnuailawng hi an ram khawchhak lam tuipuiah hian ni eng emaw chen a awm hnuah a chin hriat zui a ni ta lo nia sawi a ni.

NKorea hian US leh South Korea sipaiten nunchan an zir dun mek chu a ngaimawh hle a, vauna thu pawh a chhakchhuak fo a ni. Ram pahnih sipaiten nunchan an zir dun hnu hian NKorea hian vauna kawng khat nia ngaih turin short range ballistic missile a kapchhuak a ni.

US Naval Institute journal chuan NKorea tuihnuailawng a bo tak thut hnu hian US Navy-te chuan rang takin an chhui zui nghal niin a sawi. NKorea sipaite hian tuihnuailawng hi size hrang hrang 70 vel an nei nia sawi a ni bawk. Mahse a tam zawk hi diesel hmang model hlui tawh an ni a, an ram tuipui ven hna thawhna atan bakah hman tlak tawh vak lo nia sawi a ni. Nikum August thla khan NKorea tuihnuailawng zinga 50 vel hi an base atanga chhuahin South Korea military radar-in a man phak loh chinah an bo daih a, hei hian South Korea ram pawh a ti ralkhel hman hle.

Tuihnuailawng a bo chungchang hi North Korea chuan a sawi chhuah loh bakah, ram dang puihna pawh a dil lo a ni. Mahse satellite leh thlawhtheihna aṭanga a lan danin NKorea sipaite chuan tuihnuailawng bo hi ngawrh takin an zawng mek tih hriat a ni.