France-ah Emergency puan duh loten nawrh huaihawt

France sorkar-in an rama state of emergency a puan mek chu duh loin, kar kalta Inrinni khan Paris khawpuiah mi tam tak an pungkhawm.

Nikum November thlaa Islamic State (IS) firfiakten Paris khawpui chhung hmun hrang hrang bei a,mi 130 an thah hnuah, November 13 khan France President Fancois Hollande chuan an ram pumah emergency hi a puang nghal a ni.

Kumin February thla khan an ramah fir-fiakte pawikhawihna a thlen leh mai a la hlauh-thawnawm nia sawiin, emergency hi pawhsei a ni leh bawk.

Emergency hnuaiah security force-te chu thuneihna sang tak pek an ni a, firfiakte dapchhuah hna thawka beihpui an thlaknaah chenna in, sumdawnna hmun leh mosque 3,400 chuang zet an dap hman a, mi 300 chu pawn chhuah phalsak loa hren an ni bawk.

Mahse mi tam takin emergency puan hi an sawisel a, security force-te chu dik lo taka an thuneihna hmangah an puh. Sorkar chuan emergency a puan chu remchangah hmangin, Muslim mite a bitum bik niin muslim pawl hrang hrang chuan an sawi bawk.

Emergency puan chuan firfiakte pawi khawihna thlen chung changah nghawng a nei lo a, mahse civil mite tan harsatna a siam zawk niin Left Party hruaitu Eric Coquerel chuan a sawi.