Israel-Hamas war : Israel PM in kawtah mipui lungawi lo pung khawm

Hamas firfiakte'n October 7-a Israel chhim lam bei a, mi tam tak an kah hlum leh an man avanga lungawi loin, kar liam ta Inrinni khan mi tam tak chu Jerusalem-a prime minister Benjamin Netanyahu chenna in kawtah an pung khawm.

Mipuite pung khawmte hian Israel mite chunga pawikhawihna rapthlak tak thleng chungchangah PM Netanyahu mawphurtuah puhin, bang turin an phut. Police-te chuan pung khawmte hi an lo dang a ni.

Prime Minister hian Hamas-te'n Israel an beihah mi 1,400 chuang an thah leh, mi 240 vel an man chungchangah mimala mawhphurhna a la duh lo a ni.

Inrinni vek khan Tel Aviv khawpuiah pawh mi tam tak an pung khawma, Gaza-a Hamas-te'n an mi hren mek zinga ṭhenkhatte thlalakte kengin, heng mite hi hruai haw thuai tura sorkar an phutna thuziakte an keng bawk.

Israel sipaite'n Hamas an beih leh hnuah hian Palestinian mi 9,000 chuang an thi tawh a, Hamas mi hrente chu chhanchhuah vek an nih theihna turin theihtawp an chhuah zel dawn tih sorkar chuan a sawi. Hetih lai hian Hamas mi mante chhanchhuah an nih thuai loh avangin mi ṭhenkhat thinrimin sorkar lam an tawng ve reng bawk a ni.

IDF-in civil mite chhuahna tur kawng hawng dawn

Israel Defence Force (IDF) chuan Gaza Strip an beih mekah, Gaza City-a cheng civil mite chhim lama an inthiarfihlim theihna turin kawng hawnsak leh an tum tih an sawi.

Israel sipaite hian a hma pawhin Gaza City-a chengte chu chhim lamah inthiarfihlim turin an lo hriattir tawh a, mi eng emaw zat an insawn chhuak tawh. Hetih lai hian mi ṭhenkhat erawh an insawn chhuak duh lo thung.

IDF Arabic spokesman, Avichay Adrae chuan Gaza civil mite chu an himna atan chhim lamah, Wadi piah lamah insawn chhuak turin nimin khan a ngen leh a, Israel sipaite'n hun an hawnsak chu hmang ṭangkai turin a chah.