Taliban-in private sector-te puihna dil

Afghanistan-a rorel lai, Taliban chuan Pakistan aṭanga Afghan mi kirte chu an theih dan kawng anga lo pui turin an rama private sector-te an ngen.

Pakistan sorkar chuan an rama document nei loa lutte chu hnawh chhuah runpui hna a thawk mek a, hei vang hian Afghan mi sing tel chu an ram lamah an kir tawh a ni. Pakistan-a ram dang mi lut zinga a tam ber chu Afghan mi an ni.

Afghanistan-a ministry of commerce and industry chuan an mi leh sa kirte puih dan tur lo ngaihtuah turin private sector-te an ngen a, Islam leh Afghan mipuite chuan heng mite lo tuamhlawm hi an tihtur a ni, a ti. October 1 thleng khan Afghan mi, Pakistan aṭanga an rama kir hi mi nuai 2.5 an tling tawh a, heng mite tan hian Taliban sorkar chuan an awm lailawkna tur camp lo siamin, ei tur leh an mamawh dangte a lo buatsaih a ni. Hetih lai hian mi tam tak chuan sum engmah an neih loh avangin an khawsak chhoh zel dan tur an hre lo tih an sawi.

Pakistan sorkar chuan an rama pawikhawihna tam tak, firfiaka chetna thleng ṭhinah Afghanistan aṭanga lutte chu mawhphurtuah a puh a, Taliban chuan heng mite hi a thlawp niin a puh bawk. Mahse he puhna hi Taliban chuan an pha thung. Afghan mi tam tak hnawhchhuah an nih chungchangah Taliban acting defence minister Muhammad Yaqoob Mujahid chuan Pakistan chu vauin, an thiltih man hi an la tuar ngei dawn tih a sawi.