Turkey-a bomb puakah mi 34 an thi

Turkey khawpui, Ankara-a Kizilay square-ah Pathianni khan bomb a puak a, mi 34 an thi a, midang 125 velin in hliam an tuar.

Bomb hi car hmanga tihpuah a ni a, Kizilay district-a Guven Park-ah tihpuah a ni. Bomb puak hian a bul vela motor eng emaw zat a tikang a, dawr darthlalangte pawh a keh nasa hle.

Police-te chuan bomb puahna hmun hi an khar nghal a, foresin team-ten an endik nghal a ni. He pawikhawihna thleng hi eng pawl mahin an tih niin an la chhal lo.

Pathianni-a bomb puak hi thla nga chhunga Ankara-a bomb a puah vawi thumna a ni. Kar thum liamta-ah khan sipaite chuan-na bus chu thihchilh bomb hmanga beih a ni a, mi 29 an thi. Kurdish helpawl, Kurdistan Workers’ Party (PKK) bus beitute hi an nih thu an sawi a, mahse Turkey sorkar chuan Syrian Kurdish helpawl, PKK nena thawkdun pawl tih zawk niin a sawi thung.

Pathianni-a Ankara beih a ni hma, ni hnih kalta-ah khan US Embassy chuan security warning a tichhuak a, Ankara-a sorkar buil-ding pawimawhte chu beih a nih mai theih thu sawiin, an mi leh sate chu fimkhur turin an chah a ni.

Turkey President Recep Tayyip Erdogan chuan an ram khawpui beih a ni chu a dem thu sawiin, an ram chhunga firfiakte chetna thleng ṭhin chu nuai bo vek an tum tih a sawi. Firfiakte pawikhawihna thleng chuan an sipaite chu a tichak zawk dawn a ni, a ti.

Pathiannia pawikhawihna a thlen hnu hian Turkey thunetiute chuan an ram pumah Facebook leh Twitter an khar. Thuneitute pawikhawihna thlenna hmun thlalak hrang hrangte chu nasa taka thehdarh a nih avangin social media site pahnih hi an khar nghal a ni. Nikum khan helhoin prosecutor thah tuma silaia an tin lai thla chu thehdarh a nih avangin Turkey hian Twitter site chu alo khar tawh bawk.