Israel PM-in Israel mi beitu chhungte hrem duh

Israel Prime Minister Benjamin Netanyahu chuan Israel mite chunga kutthlaktu, Palestian mite chu an chhungte thlenga hremna na zawk siam dan tur an ngaihtuah mek tih a sawi.

Pathianni-a cabinet meeting-ah he thu hi sawiin, PM chuan Israel miten beih an tawh fo thu sawiin, a bikin West Bank leh Gaza Strip-a Israel mite chuan Palestinian mite kut an tuar fo a ni, a ti. Hei vang hian an mite thlavang hauh nan Israel mite beitu, Palestinian mi chu an chhungte thlenga hrem a, hnawhchhuah an nih theih dan tur thuneituten an ngaihtuah mek a ni.

Netanyahu chuan, "Gaza aṭanga firfiak chhungte hnawhchhuah chungchanga rawtna siam chu Attorney General chhanna ka nghak mek a ni" a ti. Pawikhawihtu firfiak chhungte hi Juda leh Samari biala sawn dan tur an ngaihtuah tih a sawi.

Israel sorkar hian tun hnaiah West Bank leh East Jerusalem-ah pawikhawihtu Palestinian mite in eng emaw zat chu a lo ṭhiahsak tawh bawk. Hei hi pawikhawihna thleng zel tur venna kawng khat atana tih a nih thu sawi mah se, human rights group hrang hrangin an sawisel nasa hle.

Nikum October thla aṭang khan Israel leh Palestinian mite inkara buaina thleng avangin Palestinian mite kut tuarin Israel mi 28 an thi tawh a, Palestinian mi 175 an thi tawh bawk.

Kar kalta Zirtawpni khan Israel mi pakhat chu Palestinian mi pakhatin chemin a vit leh a, pawikhawihtu hi Israel security force-ten an man nghal a ni. Nimin khan West Bank-a hmun hniha Israel mite beitu, Palestinian mi pathum chu Israel sipaiten an kaphlum bawk. Sipai thuchhuah chuan, Palestinian mi pahnih chuan Hebron bul, Kiryat Arba-a Israle mi kaa kalte chu lo changin an kap a, helai biala sipai duty-te chuan heng mi pahnihte hi an kaphlum nghal a ni a, sipai pakhatin hliam a tuar bawk. A hnuah mi pakhat chuan a car-in Israel sipaite motor chu a rawn su bawk a, a ni pawh hi sipaite hian an kaphlum a ni. Motor-a a sutna avang hian mi pahnihin hliam an tuar a ni.