Prophet Muhammad sawichhiat vangin Egypt minister ban

Egypt Justice Minister Ahmed al-Zind chuan zawlnei Muhammad-a chungchang mawi lo taka a sawi avangn minister a nihna aṭangin ban a ni.

Kar kalta Zirtawpni-a TV channel pakhatin a kawmnaah, Minister Zind chuan dan zawm a pawimawh thu sawichhuakin, Prophet Muhammad pawhin dan a zawm loh chuan jail-ah a tan tir ngei ang, tiin a sawi. Mahse a thusawi avang hian a tukah ngaihdam a dil leh nghal a ni.

Prime Minister Sherif Ismail chuan minister hi a ban nghal a, a thlaktu tur ruat a la ni lo.

Hetihlai hian Judge Club chuan Zind thlavang hauhna thuchhuah an siam a, Zind chu a ṭawngsual palh a, hei hi mi tin chunga thleng thei a ni tiin, hemi avanga minister a nihna aṭanga ban a ni chu an thlawp loh thu a sawi. Judge Club hotu, Abdallah Fatah chuan, "Egypt ram leh mipuite venghim tura theihtawp chhuahtu, ram dan te humhalh tura beitu hetianga hrem a ni mai hi judge-te chuan pawi an ti takzet a ni" a ti.

Ahmed al-Zind hi judge hlui a ni a, kum 2011-a an ram hruaitu Hosni Mubarak paihthlatu, Islamist movement chu na takin an lo sawisel tawh a, Mubarak-a rorelna tihtawp tuma nawrh huai-hawt a ni ṭhin pawh ṭha lo a tih thu a sawi bawk. Egypt rama dan leh thupek chawi-kan leh thuamchak a nih theihna atana beitu a ni.