Myanmar President atan Htin Kyaw thlang

Myanmar Parliament chuan nimin khan an ram president thar tur an thlang a, National League of Democracy (NLD) hotu, Aung San Suu Kyi-i ṭhianṭha leh thawhpui ṭha tak, Htin Kyaw chu thlan tlin a ni.

Myanmar Presiden thlan tur atan hian Parliament in hnih, Lower House leh Upper House bakah sipaiten candidate pakhat ṭheuh an nominate a ni. Parliament joint session chuan candidate pathumte aṭang hian president thar tur hi an thlang a, vote hmu sang ber chu President a ni dawn a, candidate dang pahnihte chu vice-president ah an awm zui dawn bawk a ni.

President atana thlan tlin tak, kum 70 mi Htin Kyaw hi Parliament Lower House, House of Representatives
aṭanga NLD-in a nominate a ni a, elected MP a ni ve lo. Upper House, House of Nationalities aṭangin NLD vek hian Chin hnam aiawh leh Suu Kyi-i thawhpui ṭha tak, Henry Van Thio a nominate bawk. Sipai thlawp party, Union Solidarity and Development Party (USDP) chuan general hlui, kum 64 mi Myint Swe a nonimate a ni. Parliament in hnihah hian sipai tan hian seat 25% dah sa ni mah se, NLD hian majority a nei pha ve ve a ni.

Nimina President thlannaah hian Htin Kyaw hian vote tla 652 aṭangin vote 360 hmuin a hmu sang ber a, President atan a tling ta a ni. Sipai lamin an nominate, Myint Swe chuan vote 213 hmuin first vice president a ni dawn a, NLD-in nominate dang, Chin hnam aiawh Henry Van Thio chuan vote 70 hmuin second vice president a ni ang.

President thlan thar kutah hian April 1 aṭangin thuneihna hlan a ni ang a, kum sawmnga chhunga Myanmar rama civil mi president dinhmuna ding thei hmasa ber a ni ang.

Parliament session zawha chanchin thar lakhawmtute a kawmnaah, Htin Kyaw chuan President atana thlan tlin a ni chu lawmawm a tih thu a sawi rualin, an ram mipuite tana hnehna ropui tak an channa ni a nih thu a sawi.

Tunge Htin Kyaw

Kum 1946 ah a piang. Mize zawi leh rinawm tak, lansarh tum lo mi a ni.

Aung San Suu Kyi-i ṭhian hnai tak niin, Yangon-ah high school an kal dun ṭhin.

Suu Kyi-in an rama mi retheite ṭanpuina tura foundation a din, Daw Khin Kyi Foundation charity a enkawl ṭhin a, a hnuah Suu Kyi-i driver-ah a ṭang zui bawk.

A pa chu writer leh poet Min Thu Wun a ni a, kum 1990 inthlanpuiah khan NLD ticket-in thlan tlin a lo ni tawh. Mahse he inthlan result hi sipai sorkarin a pawm duh lo.

A nupui, Su Su Lwin chu NLD dintu fanu a ni a, MP a nih bakah an party member
ṭangkai tak a ni.

Yangon Economics University aṭangin kum 1968 khan master degree a zo a, hemi hnu hian UK, US leh Japan-ahte a zir zawm leh a ni. Kum 1971-72 khan University of London-a Institute of Computer Science-ah a zir leh.