Putin-an Syria aṭangin a sipaite la chhuak
Russia President Vladimir Putin chuan Syria rama sipai a dahte chu nimin khan a lachhuak ṭan. Nimin zing khan Russia aircraft group hmasa ber chuan Syria hi an chhuahsan.
Vladimir Putin chuan Syria President Bashar al-Assad nen telephone-a an sawidun hnuah Syria rama Russian air force dahte lakchhuah hi an rel niin a sawi. Hemi rual hian Syria sorkar leh helpawlten inkahhai an puan mek chu a hlawh-tlin theihna atan Russia chuan air flight control center aṭangin a vil zui zel dawn tho tih a sawi.
Putin chuan Syria tuipui kam khawpui, Tartus-a Russia naval base leh chhimchhak lama Latakia khawpuia Hemimim airbasete chu dan pangngai anga kalpui chhunzawm an la ni dawn tih a sawi bawk.
Nimin zinga Russia aircraft group lak-chhuahte hi tactical bom-ber Su024, attack figh-ter Su-25, srike figh-ter Su-34 leh helicopter te an ni.
Syria ramah hian Russia sipai eng zat chiah nge awm tih hriat a ni lo a, US chuan sipai a dah hi 3,000-6,000 inkar vel niin a ring.
Nikum September thla aṭang khan Russia hian Syria sorkar puiin helho lakah beihpui a thlak ṭan a, hemi rual hian Islamic State (IS) firfiak pawlte a bei tel bawk. Thlawhtheihna hmang hian ṭum 9,000 vel zet helho awmna hmunte an bei hman a ni. Oil siam-na leh thawnchhuahna hmun 209 an kapchhia, Syria sipaite chu helhoin ram an laksak eng emaw zat an laklet pui bawk.
Thawhṭannia UN Security Council ṭhukhawm chuan Russia-in Syria
aṭanga a sipaite lakchhuah a tum chu lawmawm a tih thu leh, thutlukna dik tak a nih thu a sawi. Tun thla chhung atana council president hna chelhtu, Angola Ambassador Ismael Gaspar Martins chuan Russia president thusawi chu an thu hriat duh tak a nih thu sawiin, Russia sipaite a tahtawla lakchhuah a ni tur pawh an hriatthiam chu a tarlang.