China-in coronavirus test ti tan lawmman siam

China rama novel coronavirus leng chuan ziaawm lam a la pan thei lo a, hetihlai hian China thuneitute chuan mipuite chu conoravirus test ti tura mipuite ngenin, hospital-a kal a test tite chu lawmmanah yuan 1,000 ($143) zel pek a tiam. 

Coronavirus hmuhchhuah ṭanna, Hubei province khawpui Wuhan-ah chuan pawnchhuak ngam mumal pawh awm loin, mi vaibelchhe khat chuang chenna khawpui kawtthlerte pawh a reh thei hle. Mipuite hian hri leng hi an hlauh avangin pawn an chhuak ngam hlawm lo a ni. 

Thuneitute chuan mipuite chu khawsik leh natna dang an nei a nih chuan mahni ina tawm bo mai loin, hospital-a kala test nei turin an ngen a, test nei chuan lawmman hi an la nghal zel thei tih an sawi. 

China ramah hian coronavirus leng vangin medical mask pawh an indaih lo ṭan a, mahse ramdang leh international organisation 21-ten an thawhkhawm, medical mask maktaduai sarih, protective suit nuai thum leh goggles nuai hnih chu thawn luh a ni tawh. Hengte hi mipuite hnena sem thuai a ni dawn tih commerce ministry chuan a tarlang. 

Hetih lai hian Bejing thunei­tute chuan mipuite chu N95 mask hman a khap a, Zhejiang province-ah pawh khap a ni bawk. Official-te chuan N95 mast hi damdawi lama thawktu, coronavirus veite enkawltute hman tur chauh a nih thu an sawi. 

China-a Tianjin University chuan coronavirus test-na tur hmanrua, minute 15 lek hnua a result hriat theih nghalna tur a siam chhuak. 

Tianjin University hian Bei­jing Biotech company nena thawkdunin he hmanraw thar hi a siamchhuak a, clinical trial neihpui mek a ni. Tuna coronavirus test-na atana hman­raw hman hi Sunsure Biotech siam niin, minute 30 chhung vel nghah a ngai ṭhin a ni. 

Novel coronavirus vang hian nimin thleng khan China ramah mi 908 an thi tawh a, mi 40,171 in an kai bawk. Pathianni khan coronavirus kai enkawl zinga mi 3,281 chu enkawl dam an nih tawh avangin damdawiin aṭangin chhuahtir an ni ve thung. 

He hri leng hi China bakah ram dang 27-ah a darh tawh a, Philippines leh Hong Kong-ah mi pakhat ve vein an thihpui tih lohah chuan ram dangah he hri vanga thi hi an la awm lo. 

China sorkarin novel coro­navirus leng vanga Lunar New Year holiday, ni 10 zeta a pawhsei chu nimin khan a tawp ta. Hnathawktute pawh an hna lamah an kir leh ṭan a, mahse nimin khan hnathawhna hmun zawk erawh chu khar an la ni. Beijing-a subway line lun berah pawh rush-hour ah mipui hmuh tur an tam lo hle. 

Hnathawktute chu mask vuah tura hriattir an ni a, in­hmachhawna inbiakte pumpelh hram tura tih an ni bawk. Com­pany ṭhenkhat chuan an hnathawktute chu public transport hmang lo turin an chah bawk a ni.