Donald Trump leh Hillary Clinton-te che ṭha zel

US President thlana neih tura party president candidate tur zawnna, primary election-ah Repubican party aṭang-in Donald Trump leh Democratic party lamah Hillary Clinton-te an che ṭha tluang zel.

Thawhlehni kha state panga-a primary election buatsaih, Super Tuesday 2-ah Republican candidate zinga hmahruai mektu, Donald Trump chu Illinois, North Carolina leh Florida-ah te a chak a, Democratic party aṭangin Clinton-i pawh state pali-ah a chak bawk.

Repubublican candidate zinga mi, Senator Marco Rubio chuan a home state-ah Trump a hneh zo lo a, hei vang hian president candidate chuha a campaign pawh a tihtawp nghal thu a puang.

Donald Trum phian July thlaa Cleveland-a Republican party-in convention a neih hunah an party aiawh tura nominate a nih theih nan de-legate 1,237 a neih phak a ngai dawn a, hetihlai mi ṭhenkhat chuan Trump hian heti zat delegate hi a neih phak an ring lo thung.

Democratic party candidate zingah Hillary Clinton chuan a din-hmun a sawhnghet zel a, Florida, North Carolina, Ohio leh Illinois-ah a chak a, party candidate dang zinga amah hnaih bertu, Senator Barnie Sanders tan pawh umphak a harsa tawh dawn a ni.

Clinton-i chuan November thlaa US President thlan a nih hunah Democrats candidate a nih ngei a beisei thu a sawi a, President thlan hunah hian an party chu an chak dawn tih a sawi bawk. Republican candidate Donald Trump chu beiin, Clinton-i chuan, "President candidate chuh tum pakhat-in ral-tlan maktaduai 12 te man khawm a rawt te, US-a Muslim mi luh khap a rawtte chuan innghaisakna lam a thlawp tih a lantir a, hei hian a tihchak phah lo a, a dik loh zia a tilang zawk a ni" a ti.

US President Barack Obama pawhin Trump-a'n an rama raltlan te thawnchhuah a rawt te, Mexico nena an inrina-a daidan-na bang siam a rawtte bakah, a campaign-na-a ṭawngkam dengkhawng tak tak a hmang chu sawi-selin, "Hmeichhiate leh hnam tenau zawkte chungchang ṭawngkam mawi lo taka a sawite kan hria a ni' tiin, hei hian America hmelhmang leh hmingṭhatnate a tichhe thei a ni, a ti. President Obama chuan khawvelin an rama thil thleng mek chu a ngaihvenin, an thusawi leh chetphung-te chu a thlir reng tih a sawi.