IS ten an ram 22% chân tawh

Islamic State (IS) firfiakte chuan thla 14 kalta chhung khan Syria leh Iraq rama an ram lak zinga 22% chu an chan leh tawh nia sawi a ni.

Research company IHS-in data a tihchhuah tharah, IS te hian an ram lak tawh zinga 22% chu security force-ten an chhuh leh tawh a, hei bakah hian Turkey-Syria ramri-a an ram luah eng emaw zat an chan avangin oil atanga an sum hmuh pawh 40% velin a tlahniam tawh bawk.

IS te hian Syria rama an ram lak eng emaw zat an chan avang te, an pawl hruaitu pawimawh ṭhenkhatte thah leh man an nih avangin an thawm pawh a zawi sawt niin mithiamte chuan an sawi.

Firfiak pawl hian Syria ramah an pawl mi tur la thar reng mah se, tunhma lam angin an pawl zawmtu hi an pung chak tawh lo nia sawi a ni bawk. UK aṭanga IS zawm tura Syria pantu hi an vaiin mi 800 vel an ni a, an zinga mi 100 dawn chu an thi tawh a, mi 350 vel chu UK-ah an kir leh tawh bawk.