Greece-ah raltlan 1,000 chuang thawn let

Macedonia chuan an ramri te a khar chungin an rama raltlan lut, mi 1,000 chuang chu Greece ramah a thawn kir leh.

Raltlan mi 1,000 chuangte hian Greece rama refugee camp tawt lutuk avangin Thawhṭanni khan lui dai kaiin Macedonia hi an pan a, an zingah hian hmeichhia leh naupang pawh eng emaw zat an tel. Mahse Macedonia sipaite chuan lo dangin, Greece ramah an thawn kir leh a ni.

Ratlante rual hian an mahni puitu journalist leh activist 80 vel pawh police-te hian an man tel a, anni pawh hi Greece rama an kir leh phalsak an ni bawk.

Europe ram eng emaw zatin an rama raltlan lut tur pung chak zel venna atana ramri-a khuahkhirhna an siam leh an khar avang te, Balkan route khar a nih avang tein Greece-a raltlan lutte chu ramdang pan thei loin an tangkhang mek a ni.

Greece ramah raltlan lutte hian ramdang an pan theih tak loh vangin an awmna camp pawh a tawt hle a,ruahte a sur avangin camp boruak pawh a hrisel lo hle nia sawi a ni bawk.

Raltlan tam tak avanga Greece in harsatna a tawh mek chungchangah, European Union chuan Greece ram ṭanpuina hi pek thuai a ngai tih a sawi. EU General Affairs Council meeting chuan Greece ram ṭanpuina pek hi a rel a, chhawmdawlna an pek tur hi raltlante mamawh zualpui - tui, ei tur, damdawi leh awmna turte a ni a. Hengte hi EU emaw, a thawhpui UNHCR leh NGO emaw te hmanga pek an ni ang.

EU chuan Europe rama raltlan pung zel avangin kum 2016-2018 chhungin raltlante mamawh pekna atan hian dollar maktaduai 768.09 a ngai dawn tih a sawi a, kum 2016 atan bik dollar maktauai 329 vel a ngai dawn a ni, a ti.