NKorea-in kum 15 tang turin US zirlai hrem

North Korea supreme court chuan American zirlai, Otto Warmbier chu rim taka hnathawk chunga kum 15 tang turin a hrem.

University of Virginia zirlai, Warmbier hi kumin January thla khan a thlenna, Pyongyang a hotel pakhat aṭangin NKorea chung-chang tarlanna thil ruk a tum avangin man a ni tih NKorea media-te chuan an sawi. A hnuah state TV-ah pawh langin, kohhran pawl pakhatin hawnsak tura an chah avanga la a nih thu a sawi a ni. Thil dik lo tak a tih thu sawiin, NKorea mipuite hnathawh dan chungchang dik lo taka tarlan a tum a, thil atthlak tak a ni, a ti. A thiltih chu a dam-chhunga a thil tisual lian ber a nih thu a sawi bawk.

Kum 21 mi, Wyoming, Ohio state mi,Warmbier han a thil tihsual chu a pawm thu leh, a hma aṭanga ruahman lawk a nih thu media conference a neihah a sawi.

Warmbier hi kum thar lai vel khan a huhoa NKorea tlawhtu zingah a tel, ni nga an cham hnuah January 2 khan an haw tur chu airport-ah official ten lo dangin an lo man ta a ni. State news agency KCNA chuan Warmbie hi an ram phiarrua puhna thubuaia thiam loh chantir a nih thu a sawi a, Supreme Court chuan a hremna tur hi a tichhuak ta a ni.

NKorea hian an ram tlawhtu foreign mite a lo man tawh fo a, an ram phiarrutua puhin Korean-Canadian pastor pawh hrehawm taka damchhung tang tura hremin a tan tir mek a ni.