Brazil chief of staff-a Lula duh lohna lantir
Brazil Prime Minister Dilma Rousseff chuan prime minister hlui Luiz Inacio Lula da Silv chu chief of staff-ah a dah a, hei hi duh loin eptuten an ram khawpui hrang hrangah lungawi lohna an lantir.
Nilaini khan Brazilia leh Sao Paulo bakah khawpui pawimawh dangahte eptute hian nawrh an huaihawt a, mipui pungkhawm pawh an ṭhahnem hle. Eptute chuan prime minister hlui Lula hi eiru-a puh a nih chungchanga chhui meknaah tan tir a nih lohna turin chief of staff-ah hian dah a ni tiin an sawi.
Lula hi chief of staff a nih chuan man theih a ni dawn lo ni. Brazil danah chuan cabinet member chinte chu Supreme Court-ah chauh an chungthu ngaihtuah theih a ni.
PM hlui Lula hi sorkar hnuaia oil company lian, Petrobas-a eirukna lian tham tak thleng chhuina, Operation Car Wash tia vuahah a inhnamhnawih nia puhin police-ten darkar thum chhung hrengin thu pawh an lo zawtfiah tawh a ni. Mahse Lula chuan an puhna hi thu dik lo a nih thu leh, kum 2018-a president thlanna neih tura a chuh theih lohna tura eptute phiarrukna niin a sawi thung.
Investigator-te chuan Petrobas contract hmuh theih nan private firm-te chuan official-te hnenah thamna sum tam tham tak an pe niin an sawi. He thil hi kum 2003-a aṭanga inṭan tawh niin an sawi bawk. Petrobas-a eirukna lian tham tak thleng kaihhnawihah hian official eng emaw zat chu man an lo ni tawh bawk a, an zingah hian rorellai Workers' Party treasurer Joao Vaccari Neto leh Lula-a PM laia a chief of staff, Jose Dirceu-te pawh an tel. Lower house speaker, Eduardo chenna in pawh police-ten an dapsak tawh a ni.
Eptu hruaitu zing ami, Rubens Bueon chuan, "Brazil mipuite chuan sorkar hi an thawhpui thei tawh lo a ni. Thuneihna an chan chhunzawm zel theihnan an nihna te chu dik lo takin an hmang a ni" a ti.
Mahse PM Rousseff-i chuan eptute puhna chu a dik loh thu a sawi a, Lula chu economic policy lama tawnhriat ngah leh record nei ṭha tak a nih avanga thlang a nih thu a sawi. "Theihtawpin sorkar a pui dawn a, kan ram sum dinhmun pawh kan siamṭha ang a, thil man sang zel pawh kan khuahkhirh dawn a ni" tiin a sawi.