Britain-in Israel sawisel

Britain chuan Israel sorkarin Palestinian ram a luah, West Bank-a Juda-te chenna in sak chhunzawm a tum chu a sawisel a, hei hi remna leh muanna a awm theihna tura hmalakna tibahlah thei a ni, a ti.

British Foreign Office thupuangtu chuan thuchhuah siamin, "Israel sorakarin West Bank-a ram acre 585-a zau chu 'state land' tih chhal a, in sak a tum hi kan dem a, he ruahmanna hian state pahnih siam tuma hmalakna te a tichhia a ni" tiin a sawi.

Israel official leh local media-te chuan West Bank-a ram zau tak hi 'state land' tia a puan thu Thawhlehni khan an sawi a ni.

UK leh khawvel ram dangte chuan Palestinian rama Israel-in in a sak ṭhin chu titawp tura an duh thu leh, hei hi international law kalh a nih thu Britain chuan a sawi. "Israel hian state pahnih siam tumna chu a ngaih pawimawh takzet a nih chuan, a thutlukna siam hi a sut leh ngei ang" a ti.

Israel hian 1967 Mideast War lai khan West Bank hi a la a, hemi hnu hian a luahsak zui nghal a ni. West Bank-ah Juda-te chenna tur in eng emaw zat a sa tawh a, sak belh zel a tum bawk. Hei hi khawvel ram hrang hrangten an sawisel a ni.