US-in zirlai man chhuah turin NKorea nawr

North Korea-in an ram aṭanga thil ruk chhuah tuma puh, kum 15 chhung rim taka hnathawka tang tura a hren, zirlai Ottar Warbier chu chhuah zalen turin US chuan a nawr.

Otta Warmbier hi January 2 khan NKorea a tlawh ṭuma Pyongyang-a a thlenna hotel aṭanga thil hawn ruk a tum avangin man a ni a, criminal code hnuaiah thiam loh chantir a ni. Nilaini khan Supreme Court chuan hremna tur hi a tichhuak a ni.

White House thupuangtu, Josh Earnest chuan NKorea sorkar hnenah Warmbier chu ngaidam a, chhuah zalen nghal tura an ngen thu a sawi. NKorea chu politics khelhna hmanrua atana US mite hmangah a puh bawk.

Hetihlai hian NKorea chuan US leh South Korea sipaiten nunchan an zir dun mek chu a dem thu a sawi. Ram pahnih sipaite hian kumkhat chhunga nunchan an zirna lian ber an nei mek a, hei hi NKorea chuan an ram hruaitu zahlohna leh an laka indo puanna-ah a ngaih thu a sawi.

US leh SKorea sipaite hian March 7 aṭang khan nunchan an zir ho a, Aprl 30 thleng an nei ang. Joint military drill an neih hi Key Resolve leh Foal Eagle tin an vuah a ni.