Myanmar President thar turin rawtna theh lut

Myanmar President atana thlan thlar, Htin Kyaw chuan nimin khan Union Parliament-ah sorkar thar siam tura rawtna a siamte a theh lut.

Htin Kyaw hian a kaihhruai sorkar tharah ministry 21 siam a rawt a, ministry pathum chu sipai puala dah a nih dawn avangin minister atana a ruat tur hi mi 18 an ni ang. He rawtna hi vawiinah parliament inkhawmah sawiho a ni ang.

Ministry siam tura a rawtte chu foreign affairs, agriculture, transport, culture and religion, natural resources and environment conservation, electric power and energy, labor and immigration, national planning and finance, industry, health, education, construction, social welfare, relief and resettlement, hotels and tourist, commerce, information, ethnic affairs, president's office, defense, home affairs leh border affairs-te a ni.

Myanmar sorkar thar hi March 30 hian lakluh a ni dawn a, April 1 aṭangin hna a thawk ṭan ang.

UN Secretary General Ban Ki-moon chuan Myanmar rama civil mi President atana thlan hmasak ber, Htin Kyaw chu a lawmpui thu hrilhin, an ramah democracy tundin a nih a, inpumkhatna ṭha a awm theihna turin kawng an zawh zel a beisei thu a sawi. UN chuan Myanmar ramah remna leh muanna, hmasawnna a awm theih nan te, mihring dikna chanvo humhalh a nih theih nan te theihtawp chhuahpui zel a tum tih a sawi bawk.