Myanmar-ah Kristian VP duh loin nawrh huaihawt tum

Myanmar Vice President atana Chin hnam aiawh leh Kristian, Henry Van Thio dah a nih avangin Buddhist ṭhenkhat an lawm lo hle a, Yangon khawpuia lungawi lohna lantir tumin Yagon Regional Government hnenah nawrh huaihawt phalna an dil mek.

Kar hmasa khan Myanmar Parliament chuan an ram president tur an thlang a, National League for Democracy (NLD) in parliament upper house aṭanga president nominee atana hriat hlawh loh tak, Henry Van Thio a thlang chhuak chuan mak tih a hlawh nghal hle a ni. Hnam tenau pawl hrang hrang leh political commentator-te chuan hei an ram inpumkhatna tura hmasawnna pawimawh tak niin an ngai a, mahse Buddhisht kal firfiak, an sakhua leh hnam humhalh tuma beitute chuan NLD-in hruaitu atana a thlanchhuah hi an pawm thei lo a ni.

Kum 2012-a Buddha Goenyi protection organisation dintu, U Agga Dhamma chuan, "Vice president atana sakhaw dang betu ruat hi kan pawm thei lo. Kan ngawih bo pui mai danw lo a, mipuite duhdan ang taka vice president a nihna hi hlihsak turin kan ngen dawn a ni" a ti.

U Agga Dhamma chuan Buddhist-te chauh president atana thlan an nih theihna tur-in an ram danpui pawh siam-
ṭha turin a ngen tur thu a sawi bawk.

Buddha Gonyi pawlin Vice President Heny Van Thio duh lohna lantira nawrh an huaihawt tumah hian Buddhist puithiam pawl, Ma Ba Tha pawh tel turin an sawm. Mahse Ma Ba Tha hotu Pamuakkha chuan nawrh huaihawt tur hi an thlawp dawn lo tih a sawi a, 'Kristian sakhaw zuitute hian sakhaw dang betute tana harsatna an thlen ngai loh avangin keini Buddhist-te pawhin
ṭha takin kan khawsak pui thei a ni" a ti. Ma Ba Tha hian an rama Muslim awmte an bitum fo a, kum 2012-a Rohingya state-a Buddhist leh Muslim inkara buaina nasa tak chhuakah pawh khan a phenah an inrawlh nia puh an ni. An pawl hi Organization for the Protection of Race and Religion tia hriat
ṭhin a ni bawk a, President kalchhuak tur Thein Sein hnenah pawh Race and Religion Protection law siam turin an nawr reng a ni.