Musharaff-a zin khapna hlip

Pakistan President hlui, Pervez Musharraf chu an rama Supreme Court-in zin-chhuah khap a nihna a hlihsak. Khapna hi hlih a nih veleh Musharraf hi in entir turin United Arab Emirate (UAE) ah a zin nghal a ni.

Interior Minister Chaudhry Nisar Ali Khan chuan Musharraf hi Ni-ngani khan sorkar phalna nei loa an ram chhuahsan an khapte, Exit Control List
aṭangin paih a nih thu a sawi. Hmei hma hian Supreme Court chuan Musharraf hi a in entir theihna turin zin khapsak a nihna hi hlip turin a lo ti tawh a ni.

Musharraf-a ukil-te chuan President hlui hi a spinal cord a ṭha lo a, rang taka enkawl a ngai niin a sawi. Zinchhuah khapna hlihsak a nih tuk, nimin zing dar 4 khan Karachi airport aṭangn private airlines thlawhtheihna hmangin Dubai a pan nghal a ni, nimin vek khan medical test hrang hrang a nei nghal niin All Pakistan Muslim League hruaitute chuan an sawi.

Eptu party lian ber, Pakistan Peoples Party chuan sorkarin Musharraf-a zin-chhuah a phalsak chu an sawisel a, Parliament-ah pawh an lungawi lohna hi lantir an tum tih an sawi. Musharraf hian thubuai hrang hrang a nei mek a, heng zingah hian ram phatsantua puhna leh PPP hruaitu leh prime minister Benazir Bhutto thata puhna thubuai pawh a tel a ni.

Special court chuan ram phatsana puh thubuaiah Musharraf hi March 31 ah court hmaah amah ngei inlan turin a lo hriattir tawh a, thla hmasa khan Islamabad-a local court chuan kum 2007-a security force-ten sakhaw hruaitu, Abdul Rashid Ghazi an thah chungchangah president hlui manna tur thupek hi a tichhuak bawk.