Paris beihnaa mawhphurtu bera puh man

Kum 2015, November 13-a France khawpui, Paris khawpui chhung hmun hrang hranga pawikhawihna rapthlak tak thlenga a mawhphurtu bera puh, Salah Abdeslam chu kar kalta Zirtawpni khan Brussels, Belgium-ah man a ni a, Inrinni khan jail-ah dah luh a ni.

Paris khawpui beihna tur a ruahman avang hian kum 26 mi, Abdeslam hi thla li chhung chu Europe-in misual man tuma a zawn nasat ber a ni hman a ni. Kar kalta Zirtawpni khan Belgium police-te chuan Molebeek-a a chenna hmun an dap hnuin in aṭanga km 500 vela hlaah a keah kap fuhin an man ta a ni. Inrinni khan tualthah thubuai leh firfiakte chetna inhnamhnawihna thubuai siamsakin, hmarthlang lam khawpui, Bruges-a tan-inah dah a ni.

A tanna hmunah hian venhimna a khauh hle a, kum 2008-a tlanchhuah mai hlauhthawnawm bikte tana an siam "individual and special safety" wing-ah dah a ni.

Man a nih hnua thu an zawhfiahnaah, Abdeslam chuan Paris khawpui beih a nih ṭum khan Stade de France stadium-ah thihchilh bomb tihpuah a tum a, mahse a rilru a thlak leh niin a sawi.

Abdeslam-a ukil, Sven Mary chuan thuneitute chu ṭha taka a lo dawnsawn thu a sawi a, France rama thawn tumna erawh chuan theihtawpa an beihlet tur thu a sawi.

Paris prosecutor Francois Molins chuan Abdeslam hian Paris khawpuia bar, restaurant, Bataclan concert hall leh football stadium beihnaah khan a ruahmantu zingah a tel tih a sawi. A unaupa Brahim chuan Paris khawchhak lama restauran-ah thihchilh bomb a tipuak a, amah Abdeslam pawhin a bomb pai chu tihpuah a tum a ni, a ti.

France President Francois Hollande chuan Abdeslam hi France ramah a thubuai ngaihtuah a nih theih nan a rang thei ang bera thawnlut tur a duh thu a sawi.

Investigator-te chuan Abdeslam hian State de France stadium beitute awmna atan hian Paris-ah in a luah a, hei bakah hian a car-in stadium thleng hi a hruai niin an sawi. Thu zawh chhunzawm a la nih dawn avangin Paris beih a nih chungchang pawh chiang zawk hriat chhoh theih beisei a ni.

Zirtawpni-a Salah Abdeslam man a nih rual hian midang pakhat, Monir Ahmed Allaj pawh man a ni. Belgian prosecutor-te chuan Alaaj hi firfiaka chetnaa tela puhin thubuai an siamsak nghal bawk. Belgium police-te chuan Abdeslam-a chhungte pathum an hreng tel bawk a ni.