EU-Turkey inremna hmang ṭan

European Union leh Turkey ramin Greece rama raltlan lutte chungchanga inremna an siam chu hman ṭan a ni.

EU leh Turkey hian Turkey aṭanga Greece ram raltlan lut reng reng chu Grece-in awm phalna a pe a nih lo chuan thawn kir leh vek turin inremna an siam a, hemirual hian Turkey rama Syrian raltlan lo awmsate chu Greece aṭanga an thawn kir leh zat ang zel Europe ram hrang hrangah sawn-chhuah an remti bawk a ni.

Turkey aṭanga Greece rama raltlan lut hi an tam avangin Greece chuan an ruahmanna siam hi a taka kalpui a harsa dawn niin an sawi. Hetihlai hian he inremna siam hi duh loin Europe rama khawpui eng emaw zatah kawngzawh huaihawt a ni bawk.

Greece aṭanga raltlante thawnkir dan tur buaipui tur hian expert 2,300 vel chu Greece-ah hian an kal dawn a, an zingah hian security leh migration official bakah ṭawnglettu pawh an tel dawn a ni.

EU leh Turkey inremna siam hian tuipui aṭanga dinhmun hlauhawm tak tak hmanga raltlanten Greece ram an pan ṭhin a tihziaawm beisei a ni. Hei bakah hian Turkey chuan EU aṭangin sum lama puih-na pawh a dawng bawk ang. Kar kalta Zirtawpni ringawt khan mi 1,500 vel chuan lawng hmangin Greece hi an pan leh niin official-te chuan an sawi.

Human rights group-te chuan EU-Turkey inremna siam hi na takin an sawisel a, Amnesty International chuan EU chuan khawvelin raltlan avanga harsatna a tawh mek chu a hnung-chhawn san niin a puh.