WHO-in Covid-19 kaite enkawl nan Hydroxychloroquine hman khap lailawk
World Health Organization (WHO) chuan thuchhuah siamin, mipuite him zawk nan Covid-19 kaite enkawl nana hman ṭhin hydroxychloroquine chu hman a khap.
WHO Director General Dr Tedros Adhanom Ghebreyesus chuan malaria enkawl nana hman ṭhin, hydroxychloroquine chu Covid-19 kaite enkawl nana hman a nih thu sawiin, he hri damdawi hmuhchhuah kawngah hian enchhinna (clinical trial) hmun hrang hranga neih mek a nih thu a sawi. Enchhinna neih lai chuan hydroxychloroquine hi hman phalna bikah lo chuan hri kaite enkawlna atan hman rih loh nise tiin executive group-in a rel tih a sawi.
A hmain WHO chuan clinical trial tih lohah chuan Covid-19 enkawl nana ram ṭhenkhatten hydroxychloroquine an hman ṭhin chu a duh loh thu a tarlang tawh a ni.
Hri leng thawh hnihna thlen lohnan inveng turin chah
Ram eng emaw zat chuan an rama hri lengin ziaawm lam a pan chhoh avangin khuahkhirhnate pawh an thlahdul chho tawh a, hetihlai hian WHO chuan heng ramte hi hri leng thawh hnihna a thlen lohna tura inralring leh inveng turin a chah.
WHO emergencies head Dr Mike Ryan chuan he hri leng hi a tira a darh nasatna ramah chuan ziaawm lam a pan chho mek thu a sawi a, ram hrang hrangah he hri hi darh mah se, ram ṭhenkhatah chuan he hri leng hian ziaawm lam a pan mek a ni, a ti. Hetih rual hian Central leh South America, South Asia leh Africa-ah te chuan he hri leng hian zual lam a la pan zel thung tih Dr Mike chuan a sawi bawk.
He hri leng ziaawmna ram ṭhenkhatah chuan an ram economy-ah chhiatna nasa zawk a thlen loh nan inkhuahkhirhna an hman te chu an thlahdul a, hei hi Dr Mike chuan a pawi theih thu sawiin, inthlahdul hma lo turin a ngen a ni.
Khawvelah hri kai pun belh zel
Nimin thleng khan khawvel ram hrang hrangah Covid-19 kai hi mi 56,03,717 an awm tawh a, hri kai zinga mi 3,48,216 in an thihpui tawh a ni. Hri kai enkawl dam hi mi 23,81,878 an awm tawh bawk. Hripui leng mek hi ram leh territory 213-ah a darh tawh a ni.
US chu hri kai leh hri vanga thi tamna ber ram a la ni chhunzawm zel. US dawta hian Brazil a awm tawh a, Thawhṭanni khan hri vanga thi hi US aiin Brazil ramah hian an tam zawk a ni. US-ah hian Covid-19 kai hi mi maktaduai 1.63 an awm tawh a, Brazil-ah hian 3,74,898 an awm tling tawh bawk.