Israel-Hamas war: Netanyahu-a'n a minister pakhat suspend
Israel prime minister Benjamin Netanyahu chuan cabinet junior member pakhat chu Gaza Strip-a Israel-in nuclear strike a neih a thlawp thu a sawi avangin Pathianni khan a suspend.
PM Netanyahu office chuan thuchhuah siamin, far right party member, Heritage minister Amihay Eliyahu chu cabinet meeting aṭangin thu leh a awm hma chu suspend a ni tih a sawi.
Radio interview a neih ṭumin Minister Eliyahu hi Gaza Strip beih mhekah nuclear strike chu thil awm thei a ni em tih an zawt a, ani hian beihpui thlakna tur kawng khat a nih thu a sawi. A thusawi hi Arab ram hrang hrangte'n an dem zui nasa nghal hle. Hetih lai hian Eliyahu leh a party hian Israel nuclear dinhmun tak hi an hre chiang lo a, hmantir tura thuneihna pawh an nei pha lo.
PM office chuan,"Eliyahu thusawiah hian thudik engmah a awm lo. Beihpui thlaknaah hian Israel leh a sipaite chuan pawisawi lote tihnat loh theih dan zawngin, international law zulzuiin a kal a ni. Hnehna kan chan hma chu kan chhunzawm zel bawk ang," a ti.
Eliyahu hian a thusawi chungchang hi social media-ah sawi fiahin,'Tu pawhin kha thil kha tehkhinna mai a ni tih an hrethiam vek a ni," a ti.
Blinken-a'n inkahhai puan a thlawp lo
US secretary of state, Antony Blinken chuan Gaza-ah inkahhai puan a nih chuan Hamas firfiakte'n intuaithar nan leh, nasa zawka Israel beihna remchangah an hman a hlauhawm tih a sawi.
Hemi rual hian Israel chu beihpui a thlak mekah civil mite himna ngaihtuah tura theihtawp a chhuah a ngaih thu a sawi bawk.
Blinken hian Israel a tlawh hnuah kar liam ta kar tawp khan Jordan a tlawh leh a, Arab ram hruaitute nen meeting an nei. Arab ramte'n Israel chet dan nasa taka an demna karah, US chuan Hamas laka a ram venhimna turin Israel chuan dikna a nei tiin a thlawp chhunzawm reng tho a ni. Blinken hian inkahhai puan thlawp lo mah se, Gaza Strip-a harsatna tawk mekte chhawmdawlna pek hun siam chu ṭha a tih thu a sawi a, hemi rual hian Arab ram hruaitute'n rawtna an siamte erawh a pawmpui lo thung.
Palestinian thlawptute'n Turkey-a US sipai hmun luhchilh tum
Israel-Hamas indona thleng meka Palestinian thlawptute chuan Inrinni khan Turkey chhim lam, Adana-a US sipai hmunpui chu luhchilh an tum. Mipui pung khawmte hnawh darh nan hian Turkey police-te chuan tear gas leh water cannon te an hmang
Mipui pung khawmte hian Turkey leh Palestinian flag-te an keng a, police-te'n daidanna an siamte an tichhe bawk. Plastic chair, lung leh hmanraw dangte'n police-te hi an bei. Mahse sipai hmunpuiah hian lut thei loin police-te hian an lo dang thei a ni.
Hezbollah-te'n Israel an beih chuan US-in a sipaite inrawlhtir a tum
US chuan Israel leh Hamas firfiakte inbeihnaah Iran leh Hezbollah chu inrawlh lo turin a vau reng. Lebanon-a Hezbollah helhoin Israel hi an bei a nih vaih chuan, US chuan a sipaite inrawlh turin a buatsaih ve nghal ang, tiin a sawi.
Hezbollah chief Hassan Nasarallah chuan a hmain Israel leh US hi na takin a sawisel a, Iran thlawp Hezbollah chuan US indo lawngte chu an hlau lo a, a ṭul huna che turin Hezbollah chu a inring reng tiin a sawi a ni. Nasrallah chuan Gaza indona thleng mek leh mipuite tawrhna nasa tak thlengah America chu mawhphurtu ber a ni tiin, Israel chu a hmanrua mai a ni, a ti.