Bethlehem-a Church of the Nativity hawng leh ta

Isua Krista pianna hmun nia sawia biak in sak, Bethlehem khuaa Church of the Nativity chu hri leng vanga hun eng emaw chen khar a nih hnuah nimin aṭang khan tlawh theih tura hawn a ni leh ta. 

Church of the Nativity hi hawn ni mah se tlawh turte tan khuahkhirhna siam zui zel a ni. Ṭum khatah mi 50 chin bak an luh phal a ni lo a, khawsik neite tan tlawh phal a ni lo bawk. A kalte pawhin hmai­tuamna an hman vek a ngai a ni. 

Bethlehem khua hi Israel ram luah, West Bank-a Palestinian rorelna hnuaia awm a ni. West Bank-ah hian coronavirus kai hi mi 423 hmuh chhuah tawh niin, mi pahnihin an thihpui tawh bawk. 

Thawhṭanni khan Palestinian prime minister Mohammad Shtayyed chuan hri lengin ziaawm lam a pan chhoh avangin Thawhlehni aṭangin sakhaw hmun hrang hrang- mosque, biak leh sumdawn­­na hmunte hawn a ni dawn tih a lo puang tawh a ni.