Saudi Arabia-in June 21-ah curfew hlip dawn

Saudi Arabia chuan Covid-19 vanga an rama curfew a puan chu June 21-ah a hlip tawh dawn a, mahse holy city Mecca-ah erawh curfew hi tihtawp a la ni tel ve lo ang. 

Tunkar chho aṭang hian Saudi Arabia chuan hri leng vanga inkhuahkhirhna a siamte hlih chhoh a tum a, March 24 aṭanga darkar 24 chhung curfew hman ṭhin chu Ningani aṭang hian tlai dar 3 aṭanga zing 6 thleng hman a ni tawh dawn a ni.

Curfew hi thlahdul chhoh ni dawn mah se ram chhunga inkal pawh tawnnate chu khar a la ni chhunzawm zel dawn a, hetih rual hian May 31 aṭang chuan mosque-a ṭawngṭai tura kal chu phal a ni tawh dawn thung. Sorkar leh private-a hnathawkte chu an hna thawh phal a ni tawh dawn bawk a, mi 50 aia tam punkhawm erawh khap chhunzawm zel a la ni ang. 

Commercial activity, wholesale leh retail dawr, shooping centre, cafe leh thildangte hawn chhoh a ni tawh dawn a, hetih rual hian  beauty salon, barbershop, sport leh health club, recreational centre leh cinema-te chu la khar zel an la ni dawn thung.

March thla aṭang khan Saudi Arabia hmarchhak lama, Qatif-ah lockdown puan lailawk a ni a, a hnuah hmun hrang hranga puan belh a ni. May 23-27 inkar khan ram pum huapin lockdown puan a lo ni tawh bawk. Tunkar Inrinnia tawp tur, muslim-in an hman ṭhin Ramadan pawh huamin, April thla aṭang khan Mecca leh Medina-a mosque-te chu khar tura tih a ni.

King Salman chuan Covid-19 leng chuan oil man chungchangah nghawng a neih thu sawiin, he hri hi thunun a harsat thu a sawi bawk. Saudi Arabia-ah hian hri kai hi mi 74,795 an awm tawh a, heng zinga mi 45,668 chu enkawl dam tawh niin, hri vanga thi hi mi 399 an awm tawh bawk.