Israel-Hamas war : Israel sipaite'n Gaza City khaw laili an lut thleng tawh

Israel sipaite chuan Hamas laka beihpui an thlakna kal zelah, Gaza City khaw laili an lut thleng tawh niin Israel defence minister Yoav Galland chuan Thawhlehni zan khan a sawi.

Minister chuan,"Israel Defence Force sipaite chuan hmar lam leh chhim lam aṭangin khawpui chhung hi an lut a ni," a ti. Isarel chuan Gaza City hi Hamas firfiakte chet lakna hmunpui berah a ngai a, Gaza Strip-a Hamas rorelna chu tihtawp ngei a tum a ni. Indona a tawp hnuah Israel chuan Gaza security chu a vil zui zel dawn a, Israel tihnat tumte chu nuaibo zel an ni ang, a ti.

IDF Southern Command-a commanding officer, major general Yaron Finkelman chuan kum tam tak hnuah a vawi khatna atan, IDF chuan Gaza khawpui laili laiah lutin, firfiakte hmunpui an bei dawn tih a sawi ve bawk.

Indo thlawhtheihna hmangin Israel sipaite hian Hamas ho hmun hrang hrang an la bei chhunzawm reng bawk. Nimin khan Gaza-a Hamas ralthuam siamtu pawimawh tak, Mahsein Abu Zina leh Hamas mi leh sa eng emaw zat chu airstrike an neihnaah an thi niin an sawi.

Resolution chungchangah UNSC an la lungrual thei lo

Israel-Hamas indona chu thla khat a tling tawh a, heti chung hian he indona thleng mek chungchangah United Nations Security Council chu resolution chungchangah an la in inlungrual thei lo.

Thawhṭanni khan Israel-Hamas war chungchanga resolution chu member-te'n darkar hnih chuang an sawi ho leh. US chuan indona thleng mek tuartute chhawmdawl leh ṭanpuina hun siama chawlh lawk, 'humanitarian pause' siam turin a duh a, mahse, council member dangte chuan inkahhai puan, 'humanitarian cease-fire' siam turin an phut thung. Hei vang hian 'pause' leh 'ceasefire' tih chungchangah member-te hi an lungrual thei lo a, resolution pawh a pass thei leh ta lo a ni.

US-ah sipai lawng lian dang

US-a Palestinian thlawptute chu Thawhṭanni khan Washington state-a Tacoma Port-ah pung khawmin, Israel tana thawn tur, ralthuam phurtu nia an hriat sipai lawng lian chu dan an tum.

Pung khawmte chuan he lawnga ralthuam phurhte chu Israel hnena pek a nih chuan, Gaza Strip a beih meknaah a hmang ngei dawn nia an ngaih thu an sawi. US foreign policy leh US-in Israel tana funding a siamte chu ennawn an duh thu an sawi.

Lawng lian hian Israel hnena ralthuam thawn tur a phur em tih erawh finfiah a ni lo. Hetih lai hian Pentagon thupuangtu, Jeff Jurgenson chuan lawng hi US military cargo puitu tur zawk a ni tih a sawi a, a bak erawh a sawi chiang duh lo thung.