Indonesia-ah magnitude 6.9-a nain lir a nghing

Indonesia-a Banda Sea region-ah nimin khan magnitude 6.9-a nain lir a nghing.

European Mediterra­nean Seismological Centre (EMSC) chuan lir nghin ṭanna hi Ambon chhim chhak lam km 370 vel, lei hnuai km 146-a thuk niin a sawi. Pacific Tsunami Warning Center (PWTC) chuan lirnghing vang hian tsunami a thlen palh hlauhthawnna a awm lo tih sawiin, warning an tichhuak lo.

Indonesia hi Pacific 'Ring of Fire' a awm a nih avangin lir a nghing fo a, nimin lirnghing pawh hi na viau mah se, mipuite erawh an chiai buai lo niin a nghinna biala chengte chuan an sawi. Tsunami warning a awm loh avangin nunphung pangngai taka an awm leh nghal mai thu an sawi a ni.

Nikum November thla khan magnitude 5.6-a naa West Java province-a lirnghing avangin mi 602 an thi. Lirnghing avanga chhiatna an tawh rapthlak ber chu kum 2004-a magnitude 9.1-a nain a sawi ṭum kha a ni. He lirnghing hian tsunami na tak thlenin, chhiatna a thlena thi hi mi nuai 2 chuang an tling a, Indonesia ram bikah thi hi nuai 1.7 an awm.