Bangladesh garment worker-te'n hlawh tihpunna pawm lo

Bangladesh-a garment worker-te chuan an hlawh tihpun phutin hun eng emaw chen nawrh an huaihawt hnuah, Thawhlehni khan sorkar chuan an thla hlawh hi 55% in a tipung a, mahse, hei hi hnathawkte hian pawm loin an hnawl.

Bangladesh-ah hian thawmhnaw siamna, garment factory hi 3,500 vel awmin, thawktu hi mi maktaduai li vel an awm. Bangladesh-in kum khata a thil thawn chhuah zinga 85% chu garment factory-te thil siam chhuah hi a ni. Mahse hnathawkte hi hlawh pek chhiat an nih avangin, an hlawh san phutin nawrh an huaihawt a, hei vang hian factory tam tak chu hna thawk thei loa khar a ngaih phah hial.

Sorkarin a ruat, board chuan garment worker-te minimum monthly wage atan hian taka 12,500 ($113) a bithliah tih board secretary Raisha Afroz chuan a sawi a, mahse, worker union lam hian hei hi hnawl nghalin, a tlem berah an thla khat hlawh hi taka 23,000-a bithliahsak an phut.

Bangladesh Garment and Industrial Workers Federation hruaitu, Kalpona Akter chuan board rawtna hi an pawm thei lo tih a sawi a, thuneitute chuan market lam an ngaihtuah tak tak lo a, anmahni hamṭhatna chauh an ngaihtuah a ni, a ti.