Ruah surin Australia ram tidai

Australia ramah chawl loa darkar 24 chhung ruah a sur avangin, ramchhung khawlum leh ram kanna hmun ṭhenkhatte chu a tih ziaawm phah tih Australia Bureau of Meteorology chuan a tarlang.

Australia-ah hian Pathianni aṭang nimin zing thleng khan chawl loin ruah a sur a, chawhrualin rampuma ruah sur tam lam hi millimeter 176 a ni. Tun kar chhoah pawh hian a sur belh zel rin a ni a, thuneitute chuan millimeter 200 a tlin chhoh an ring a ni.

Ram kang avanga meikhu leh a si perte chuan ramchhunga tui a tih thiang­hlim loh phah theih thu tarlan a ni. Ram kan nasatna hmun, New South Wales-a cheng mipuiten tui thianghlim an dawn theih nan theihtawpa hmalak an tum thu thuneitute chuan an tarlang.

Australia-a ram kang vang hian chenna in 3,000 chuang a chhe tawh a, hriat theih chinah mi 31-an thi tawh bawk. Pathianni vek khan Australia thlang lamah kang mei a chhuah thu tarlan leh a ni. Hei bakah hian thli leh ruah chuan Australia hi a nuai chho dawn nia sawi a ni bawk. 

Kar liam ta Inrinni khan tropical cyclone Damien chuan Australia chhim lam a nuai nia sawi a ni a, hei hian lei tawlh a thlen a ni.