Israel-Hamas war: Israel-in ni tin darkar li zel beihpuithlak chawlh a remti

Israel chuan Gaza Strip-a Hamas laka beihpui a thlak mekah, civil mite chhuahna tur leh, chhawmdawl hna thawhna atan, Gaza hmar lamah ni tin darkar li zel beihpuithlak chawlh lawk ṭhin a remti tih US chuan a sawi.

US president Joe Biden chuan November 6-a Israel prime minister Benjamin Netanyahu a biak ṭumin, ni tin chawh lawk lai nei tur hian a lo ngen tawh a ni. US national security council thupuangtu, John Kirby chuan Israel-in chawlh lailawk an siam hun tur hi puan a ni thuai dawn a, a hma darkar thumah an lo puang lawk ṭhin dawn bawk a ni, a ti. Hemi rual hian hei hi Israel leh Hamas-te inkara inkahhai puanna a ni lo tih a sawi nghal bawk.

Israel chuan Hamas nen inkahhai puan tumna a nei lo tih a sawi a, mahse, Palestinian mipuite chhawmdawlna turte thawn luh a nih theihna tur erawh chuan indo kar laka lo chawlh lailawk erawh a remti tih a sawi. Israel sipai thupuangtu Richard Hecht chuan, "Inkahhai kan puang lo, hei hi kan sawi nawn duh. Mahse mipuite chhawmdawlna pekna turin darkar li chhung kan chawl dawn zawk a ni," a ti.

US pawhin inkahhai puan hi a thlawp lo a, inkahhai puan a nih chuan Hamas firfiakte'n ralthuam lak luhna leh, Israel beihna tura inthuam chakna atana an hman a hlauhthawnawm thu a lo sawi tawh a ni.

Gaza health ministry-in a tarlan danin, October 7-a Israel-te'n Gaza Strip an beih aṭangin Palestinian 10,812 an thi tawh a, an zingah hian naupang 4,412 an tel niin a tarlang.

Hamas mi mante chhuahna turin inbiakna nei zel

Hamas-te'n Israel an beih ṭuma an mi mante chhuah an nih theihna turin Qatar-ah inbiakna neih a ni. Hamas-te hian mi 200 chuang an man a, an mi man zinga mi pali chu an chhuah tawh a ni.

CIA director William Burns chu Ningani khan Doha-ah kalin, Hamas mi hren mekte chhuah an nih theihna tura hmalak dan turte chu Qatar prime minister Sheikh Mohammed bin Abdulrahman Al Thani leh Israel Mossad intelligence agency hotu David Barnea te a sawipui.

Hamas ho hian Israel mi an hren mek zinga hmeichhia pakhat leh mipa naupang pakhat video a tichhuak leh. Hemi hma hian Israel mi hmeichhe pathumte video pawh a lo tichhuak tawh bawk.