Myanmar sipai leh hel pawl inbeihna avangin mi 90,000 tlanchhia

United Nations chuan tun hnaia Myanmar hmar lam, Shan state-a sipai leh hel pawlte inbeihna avangin November 9 thleng mi 50,000 vel an tlanchhe tawh tih a sawi. Hei bakah hian November thla chhung vek hian Sagaing region leh Kachin state-a sipai leh hel pawl inbeihna avangin mi 50,000 vel an tlanchhe tawh bawk a ni, a ti.

Myanmar-a hel pawl inzawm khawm chak tak mai, Three Brotherhood Alliance chuan kar hnih liam ta khan Shan state-a military outpost eng emaw zat beiin an la a, China ramri bula Chin Shwe Haw khua pawh sipaite kut aṭangin an laksak bawk.

October 26 aṭanga sipai leh hel pawlte inbeihna thleng avanga tlanchhia tam zawk hi sakhaw hmun hrang hrangah an khawsa a, an ram chhung khaw danga tlanchhia pawh eng emaw zat an awm bawk a ni. Tun ṭuma inbeihna hi kum 2021, February thlaa sipaite'n Aung San Suu Kyi kaihhruai civil sorkar paihthla a, thuneihna an chan hnuah hel pawlte nen an inbeihna nasa ber a ni.

United Nations Office for the Coordination of Humanitarian Affairs (OCHA) in nimina thuchhuah a siamah, inbeihna thleng hian transport, communication leh service dang pawh a tibuai hle tih a tarlang. Kawngpui khar a ni a, lei te kah chhiat a nih bawk avangin chhawmdawlna pawh a hun taka thawn theih a ni lo niin a sawi.