Toulouse khelmualah Reds an mualpho

Luton Town laka point an hlawhchhuah hram hnua an match hmasa berah Liverpool-in Europa League an khel a, Anfield-a 5-1 ngawta an sawp tawh hnu Toulouse chu 3-2 in an ngam lo - knockout round lut turin an nghah hret a la ngaih phah.

Toulouse hian Aron Donnum leh Thijs Dallinga goal hmangin 2-0 in hma an hruai hman hial. Liverpool hian minute 74-naah si phurh an sut hram a, mahse, hei pawh Cristian Casseres Jr-a 'own goal' a ni!

Liverpool hlim chhung a rei lo takzet - Frank Magri chuan French club tan minute hnih hnu lawkah goal a khung leh a, 3-1 a ni! Hun tawp nan minute khat chiah a awm tawh tihah Diogo Jota chuan si phurh a sut ṭhen leh a, Liverpool-in beiseina thar an nei.

Reds tan centre back ṭhangduang Jarell Quansah chuan hun pek belhah si phurh sutna goal a khungah a inngai hman a, mahse, referee-in video assistant referee a rawn hnuah Alexis Mac Allister handball vangin pawm a ni lo.

Hun a tawp zui a, lawm lo takin Liverpool an haw - Reds manager Jurgen Klopp chuan, "Kan huaisen tawk lo a, awlsam taka ball hloh kan ching a, tihsual pawi tak a ni. Kan ball chan zat ngaihtuah chuan kha aia tam goal khung tur kan ni a, mahse, goal thum kan chhuah thung - awmzia hi a nei hlawl lo a ni.

"Toulouse khan chak an duh zawk a, an phu zawk bawk. Ka lawmpui a ni," tiin duhsakna a hlan a, a player-te chungah a lawm lo tih a hriat.

German coach hian Luton nena in draw aṭang khan player pakua a siksawi a, chance nei tam lo zawkte a chhawr chungin Mac Allister, Cody Gakpo leh Luis Diaz te bul ṭan zingah an tel a, Mohamed Salah, Dominik Szoboszlai, Trent Alexander-Arnold, Darwin Nunez leh Jota te bench aṭangin an lut bawk - Pathianni zan dar 7:30-ah league match khel turin Brentford an mikhual zui ang.