Israel-Hamas war : Gaza-a civil mi hrente chhuahna turin Israel leh Hamas inbia

Hamas firfiakte'n Israel an beih ṭuma an mi man, Gaza Strip-a an hren zui mekte chhuah dan kawng dapin Hamas leh Israel aiawhte an inbe mek.

Hamas mi hrente chhuah dan tur chungchangah hian rawtna pahnih a awm a,pakhat zawkah chuan mi tlemte chauh chhuah phawt tih a ni a, a ṭum hnihnaah erawh chuan Gaza strip-a civil mi 100 chuang hren mekte chhuah zalenna tur a ni.

Gaza hmunah hian mi 240 chuang hren mek an ni tih Israel official-te chuan an sawi. Tang zinga a chanve aia tam chu civil mi an ni tih sawiin, an zavaia chhuah zalen ngei theih nan theihtawpa hma lak mek a ni tih official pakhat chuan a sawi.

Hamas chuan civil mi 10-20 hrente chhuah phawt a, Israel lam hi ni rei lote chhung inkahhai puang turin an dawr mek tih official pakhat chuan a sawi. Hei hi a hlawhtling a nih chuan, civil mi 100 chuang chu chhuah zalen zui tura tih an ni. Hamas chuan an mi hrente zawng zawng a chhuah chuan, Israel-te chu hun eng emaw chen indo chawlhsan a, damdawi in mamawhte lak khawmna hun siamsak tur leh, hmeichhia leh naupangte chhuah ve turin an ti a ni.

Ram pahnihte indawrnaah hian Qatar chuan palai hna a thawk reng a, United States official-te pawh an inrawlh bawk a ni.

US official-te chuan rei lote chhung indo chawlh lailawk chu an thlawp thu sawiin, hemi chhung hian Gaza mipui mamawh zualpui lak khawm theih a nih bakah, tangte chhuah zalenna atan a ṭul thu an sawi. US secretary of state Anthony Blinken chuan New Delhi-a media mite a kawmnaah,"Kan ram mi tangte hruai haw turin theihtawp kan chhuah reng a ni," a ti.