Tlang kang hlauhthawn avangin Iceland-ah emergency puang

Iceland ramah tun hnaiah vawi tam tak lir a nghin avangin tlang kang a thlen palh thulha invenna atan state of emergency puan a ni. Thuneitute chuan Grindavik chhimthlang lama chengte chu khua chhuahsan turin an hriattir.

Icelandic Meteorological Office (IMO) chuan Reykjanes peninsula hmunah tlang a kan a hlauhthawnawm thu a sawi. Nimin zing aṭang khan tlang kan hi a hlauhthawnawm zual tih sawiin, tlang kang hi thleng thei reng dinhmunah a awm mek a ni, an ti.

Fagradalsfjall volcano chhehvelah hian tunhnaiah vawi sang chuang lirnghing tenau a thleng tih record a ni. Kar liam ta Ningani khan leihnuai a chet nasat avangin Blue Lagoon landmark chu khar a lo ni tawh bawk. October thla chawhnu lam aṭang khan Iceland chhimthlangah hian lirnghing tenau ṭum 20,000 chuang a thleng tawh.

IMO-in tlang kang inṭham mek chuan Grindavik a thleng dawn lo tih an sawi lawk theih loh avangin fimkhur thilah khua chhuahsan turin hriattirna an tichhuak ta a ni tiin Iceland Civil Protection Agency chuan a sawi. Kar liam ta Zirtawpni khan Agency chuan khua chhuahsan tura hriattirna hi a tichhuak a, mahse, emergency evacuation a nih loh avangin mipuite chiai lo tur leh hmanhmawha innekbuai lo turin a chah.

Iceland ram hi khawvela volcano tamna ber niin, tlang kang thlenna hi hmun 30 dawn lai a awm a ni. July thla khan Fagradalsfjall hmuna tlang pakhat Litli-Hrutur/Little Ram chu nasa vak loin a kang a, hei hian zinmi ṭhahnem tak a hip luh phah nghe nghe.